Санитария-эпидемиологик осойишталик ва жамоат саломатлиги хизматининг Бухоро вилояти бошқармаси бошлиғи Ашур Тўхтаев ўғлининг тўйида 53 киши қатнашгани аниқланди ва унга нисбатан 4 460 000 сўм миқдорида маъмурий жавобгарлик қўлланилди. Бу ҳақда вилоят Давлат санитария-эпидемиология назорати бошқармасига таяниб, «Дарё» мухбири Лайло Ҳайитова хабар бермоқда.
Бухоро вилоят Давлат санитария-эпидемиология назорати бошқармаси бошлиғи ўринбосари Ўктам Сафоевнинг маълум қилишича, Ашур Тўхтаев 2020 йилнинг 25 октябрида Бухоро шаҳридаги «Ипак йўли» ресторанида карантин талабларига риоя қилмай, 53 нафар фуқарони йиғиб, ўғлининг тўй маросимини ўтказганига ойдинлик киритилган. Тўйга келган мазкур 53 нафар киши иккала қуда томоннинг оила аъзолари, хонандалар ҳамда тўй хизматчиларидан иборатлиги аниқланган.
Ўғлининг тўй маросимида пандемия даврининг мажбурий қоидаларини бузганлиги учун Ашур Тўхтаевга нисбатан маъмурий иш материаллари тўпланган. Ҳужжатларга кўра, у «Аҳолининг санитария-эпидемиологик осойишталиги тўғрисида»ги қонунининг 39-моддаси (аҳолининг санитария-эпидемиологик осойишталиги тўғрисидаги қонун ҳужжатларини бузганлик учун жавобгарлик) ҳамда Маъмурий жавобгарлик тўғрисидаги кодекснинг 54-моддаси 2-қисмида (эпидемияларга қарши кураш қоидаларини бузиш) назарда тутилган ҳуқуқбузарликни содир этган, деб топилган. Шу модда билан базавий ҳисоблаш миқдорининг 20 баравари, яъни 4 460 000 сўм жарима жазоси тайинланган.
Мазкур тўйни ўтказишда тўй эгасини жой билан таъминлаган «Ипак йўли» ресторани раҳбари Эркин Жўраев 150 киши билан ўтказилган тўй ҳақидаги гап-сўзларга муносабат билдирганда, унинг тўйхонасида ҳар куни 80 кишилик маросим ўтказилаётгани ва бу юзасидан бирор изоҳ беролмаслигини айтган эди.
«Дарё» мухбирининг «Ипак йўли» ресторанида шу кунгача 30 кишидан ортиқ фуқароларни тўплаш тақиқланган бўлишига қарамай, ҳар куни 80 киши билан ўтказиб келинаётган бошқа тўйлар ва тадбиркор хатти-ҳаракати нега эътибордан четда қолаётгани хусусидаги саволга вилоят Давлат санитария-эпидемиология назорати бошқармаси бошлиғи ўринбосари Ўктам Сафоев: «Эътиборни фақат тўй ўтказган одамга қаратибмиз. Унга нисбатан ҳам жарима жазосини қўллаш чораларини кўрамиз», — дея жавоб қайтарди.
Эслатиб ўтамиз, Санитария-эпидемиологик осойишталик ва жамоат саломатлиги хизматининг Бухоро вилояти бошқармаси бошлиғи Ашур Тўхтаев 25 октябрь куни ўғлининг тўйини Бухоро шаҳридаги «Ипак йўли» тўйхонасида ўтказган, маросимда 50 дан ортиқ киши қатнашгани ҳақида аввалроқ хабар берилганди. Ашур Тўхтаевнинг ўз эса бу ҳолатни «ўзбекчилик» дея изоҳлаганди.
Изоҳ (0)