2-noyabr kuni bosh vaziri o‘rinbosari — investitsiyalar va tashqi savdo vaziri Sardor Umurzoqov Qozog‘iston bosh vaziri o‘rinbosari Roman Sklyar bilan uchrashdi. Bu haqda vazirlik matbuot xizmati xabar berdi.
Ta’kidlanishicha, uchrashuv chog‘ida investitsiyaviy, savdo-iqtisodiy, sanoat, transport va logistika sohalarida ko‘p qirrali hamkorlikning bugungi holati hamda uni yanada mustahkamlash va kengaytirish istiqbollari muhokama qilingan.
Ikki davlat rahbarlari tomonidan savdo aylanmasini 10 milliard dollarga yetkazish bo‘yicha qo‘yilgan vazifani faqat ikki mamlakat tegishli vazirlik va idoralarining o‘zaro savdo, bojxona qoidalari, standartlarini soddalashtirish va muvofiqlashtirish, bojxona axborot tizimlarini integratsiyalash, zamonaviy logistika markazlari qurish, chegara punktlarini rekonstruksiya qilish, zamonaviylashtirish bo‘yicha kompleks chora-tadbirlarni amalga oshirishga qaratilgan muvofiqlashtirilgan ishlarini olib borishi orqali amalga oshirish mumkinligi qayd etilgan.
Bundan tashqari, Markaziy Osiyo Xalqaro savdo-iqtisodiy hamkorlik markazini (XSIHM) yaratish bo‘yicha birgalikdagi amaliy ishlarni davom ettirish to‘g‘risida kelishuvga erishilgan.
“Tomonlar O‘zbekiston va Qozog‘iston o‘rtasidagi Hududlararo hamkorlik forumi hamda Ishbilarmonlar kengashi imkoniyatlaridan faol foydalanish, xususiy sektorni ikki tomonlama iqtisodiy hamkorlikni kengaytirishga faol jalb qilish haqida fikr bildirdi”, — deyiladi xabarda.
Shuningdek, O‘zbekiston va Qozog‘iston yirik shaharlari o‘rtasida xalqaro avtobus qatnovlarini yo‘lga qo‘yish, Turkiston–Chimkent–Toshkent tezyurar temir yo‘li hamda Uchquduq–Qizilo‘rda transport yo‘lagi qurilishi muhokama qilingan.
Uchrashuv yakunlari bo‘yicha har ikki mamlakat bosh vazirlari o‘rinbosarlari yakuniy bayonnoma, shuningdek, sanoat kooperatsiyasi sohasida 22 ta aniq loyihalarni amalga oshirishni ta’minlashni nazarda tutgan O‘zbekiston va Qozog‘iston o‘rtasida hamkorlikni kengaytirish hamda chuqurlashtirish bo‘yicha amaliy chora-tadbirlar rejasini (“Yo‘l xaritasi”) qabul qilingan.
Avvalroq bosh vazir Abdulla Aripov Qozog‘iston bosh vaziri o‘rinbosari Roman Sklyar boshchiligidagi hukumat delegatsiyasi vakillarini qabul qilgani va tomonlar “to‘siqlarni yechish” va aksiz siyosatini liberallashtirish masalalarini muhokama qilgani to‘g‘risida xabar berilgandi.
Izoh (0)