Toshkentning Olmazor tumani hududida qurilayotgan Islom sivilizatsiyasi markazi sabab hududdagi 237 ta xonadon buzildi. Bu haqda tuman hokimligi axborot xizmati xabar berdi.
Ma’lum qilinishicha, mahalliy aholi Yashnobod tumanidagi Maxtumquli ko‘chasida joylashgan “Yashil bog‘” turar joy majmuasidagi yangi qurib foydalanishga topshirilgan ko‘p qavatli uylarga ko‘chib o‘tmoqda.
“Ular ham ko‘rkam, ham yorug‘, ham keng va shinam yangi xonadonlardan mamnunlar”, — deyiladi xabarda.
Ta’kidlanishicha, islom dini rivojlanishi yo‘lida xizmat qiluvchi Islom sivilizatsiyasi markazi qurilishi uchun jami 241 ta xonadon buzilishga tushgan bo‘lib, hozirga kelib ularning 237 tasi buzib bo‘lingan. Olmazor tumani hokimligi qoshida tashkil etilgan maxsus komissiya xulosasiga asosan ushbu xonadonlar egalariga uy-joylar ajratilgan. Hozirgi kunda qolgan 5 ta xonadon egalariga esa uy-joylarni ajratish ishlar olib borilmoqda.
“Yaqin kunlarda ularning uylarida ham buzilish ishlari olib boriladi. Bu jarayon 10-noyabrga qadar yakunlanishi rejalashtirilgan”, — deyiladi xabarda.
Eslatib o‘tamiz, markaz binosi 2020-yil kuzda foydalanishga topshirilishi rejalashtirilgan edi. 2020-yil noyabr oyida O‘zbekiston Islom hamkorlik tashkilotining fan va texnologiyalar sohasidagi hamkorlik bo‘yicha Doimiy qo‘mitasi sammitiga mezbonlik qilishi kerak.
2019-yilning dekabrida Islom sivilizatsiyasi markazida yong‘in yuzaga kelgani, yong‘in oqibatida qurilayotgan bino yerto‘lasida joylashgan, ta’mirlash uchun olib kelingan teploizolyatsiya (penoplast) qurilish materiallari 150 kvadrat metr maydonda yongani to‘g‘risida xabar berilgandi.
Izoh (0)