Шавкат Мирзиёев Ўзбекистонда гидрометеорология хизматини ривожлантириш масалалари бўйича йиғилиш ўтказгани тўғрисида хабар берилганди. Йиғилишда таъкидланишича, Ўзбекистонда аэрологик кузатувлар 1995 йилдан буён олиб борилмаяпти, бу эса об-ҳаво тўғрисидаги маълумотларнинг ишончлилигини пасайтиради, деб ёзади Президент матбуот хизмати.
«Биз об-ҳаво маълумотларини аниқ билишимиз керак. Агарда Бухородаги станцияларимиз яхши ишлаганида, шамол бўлишини олдиндан билганимизда, чора-тадбирлар кўрилар эди. Лекин, минг афсуски, бизда аэрологик кузатув 1995 йилдан бери амалга оширилмайди», — дейди Президент.
Шавкат Мирзиёевнинг сўзларига кўра, соҳага хусусий сектор киритилмаса, ҳозирги чора-тадбирлар билан ҳеч нарсага эришиб бўлмайди.
«Биз катта қарор тайёрлаяпмиз… Энг катта муаммо — соҳада сифат йўқ. Бу сифатга ўрганмаганмиз ва талаб бўлмаган. Аслида бу жуда катта фойда келтирадиган соҳа, лекин биз бунга эътибор бермаганмиз. Мана, қишлоқ хўжалигини ислоҳ қиляпмиз, бу эса барча кластерларга керак… Буни тижоратлаштириш бўйича жуда кўп имкониятлар бор», — дейди Шавкат Мирзиёев.
Аввалроқ Ўзбекистон гидрометеорология хизмати самарали фаолият юритиш учун ходимларнинг ойлик маошлари камлиги ва малакали кадрлар кетиб қолиши каби масалаларни зудлик билан ҳал этиш лозимлигини маълум қилганди.
Эслатиб ўтамиз, Бухорода 27 апрель куни юз берган кучли шамол оқибатида 41 085 та уйга, 842 та ижтимоий объектларга шикаст етган. 12 мингдан ортиқ буғдой ва 6400 пахта далалари яксон бўлган. Шунингдек, табиий офат оқибатида бир киши ҳалок бўлган, 41 киши жароҳатланганди. Кучли шамолдан сўнг Бухоро, Навоий, Сирдарё ва Самарқанддаги салкам 140 минг хонадон газсиз қолган. Бухоро кучли шамолдан сўнг электр таъминотида энг катта талафот кўрганди. Аҳолини қўллаб-қувватлаш ва инфратузилма объектларини қайта тиклаш учун биринчи ярим йилликда 164 миллиард сўм йўналтирилган эди.
Изоҳ (0)