Ozarbayjon prezidenti Ilhom Aliyev Yerevan bosib olingan hududlardan o‘z qo‘shinlarini olib chiqib ketish majburiyatini zimmasiga olsa, Boku Tog‘li Qorabog‘dagi urushni to‘xtatishga tayyor ekanligini ma’lum qildi. Bu haqda u Italiyaning La Repubblica gazetasiga bergan intervyusida ta’kidlab o‘tgan, deb xabar beradi “RBK”.
“Agarda Armaniston bosh vaziri qolgan hududlarni ham ozod etish majburiyatini olsa, biz bugunoq to‘xtashga tayyormiz. Hozircha u bu kabi majburiyatlarni zimmasiga olmadi”, — deydi Aliyev. Uning ta’kidlashicha, urush qancha tez tugasa, shuncha yaxshi bo‘ladi.
Ozarbayjon prezidenti BTM Xavfsizlik Kengashi rezolyutsiyasining asosiy tamoyillariga ko‘ra, dastlab beshta tumanni, so‘ng yana ikkitasini ozod etish zarurligini eslatib o‘tgan.
“Biz hozirga qadar bir tomonlama tartibda to‘rtta tumanni ozod etdik. Shu sababli Armaniston bosh vaziri Nikol Pashinyan bosib olingan qolgan hududlar — Ag‘dam, Kelbajar, Lochin tumanlaridan qo‘shinlar olib chiqib ketilishini aytishi kerak. Ammo u bu kabi bayonotni bermayapti. Bu esa u urushni to‘xtatishni xohlamayotganidan dalolat”, — deydi Aliyev.
Pashinyanning so‘zlariga ko‘ra, Yerevan Qorabog‘dagi mojaroni hal etish bo‘yicha muzokaralarga tayyor, ammo uning fikricha, Boku yon bosmayapti.
Avval Yevropada xavfsizlik va hamkorlik tashkilotining Minsk guruhi Armaniston va Ozarbayjon tashqi ishlar vazirlari Jenevada uchrashuv o‘tkazgan hamda Tog‘li Qorabog‘dagi fuqarolik obyektlariga o‘t ochmaslikni kelishib olgandi.
Mavzuga doir:
19-oktabrda Armaniston bosh vaziri Nikol Pashinyan va Ozarbayjon prezidenti Ilhom Aliyev Tog‘li Qorabog‘dagi mojaro bo‘yicha muzokaralar o‘tkazishga tayyorligini ma’lum qilgan. Keyinroq Pashinyan Tog‘li Qorabog‘da Rossiya uchun bevosita xavf soluvchi Suriya terrorchilik guruhlari jangarilari bo‘lganligi uchun Moskva u yerda aksilterrorchilik operatsiyalarini o‘tkazish uchun asosga ega ekanligini aytgan.
Izoh (0)