Қозоғистоннинг Ғарбий Қозоғистон вилоятида коронавирус билан такроран касалланиш бўйича биринчи ҳолат қайд этилди. Бу ҳақда Tengrinews хабар берди.
Ғарбий Қозоғистон вилояти соғлиқни сақлаш бошқармаси раҳбарининг ўринбосари Гулнора Абдураҳмонованинг маълум қилишича, коронавирус билан қайта касалланиш бўйича дастлабки ҳолат аёл кишида қайд этилган.
Мазкур аёл пандемия бошида — апрель ойида коронавирус билан касалланган. Иккинчи марта эса касалланиш август ойида кузатилган. Икки ҳолатда ҳам бемор аёл стационар шароитда даволанган.
Қозоғистонда коронавирус билан касалланиш ва COVID-19 белгилари билан кузатиладиган пневмонияга чалиниш ҳолатлари сони ҳар куни ортиб бормоқда. Касалланиш ҳолатлари сонининг ортиши бирданига мамлакатнинг бир нечта вилоятида кузатилмоқда, шаҳарлар ва вилоятлар атрофида санитар ва блокпостлар ўрнатилмоқда.
Аввалроқ коронавирус тарқалиши муносабати билан Қозоғистон ўз давлат чегарасини кесиб ўтиш бўйича чеклов чораларини кучайтириши ҳақида хабар берилганди.
Эслатиб ўтамиз, октябрь ойи охирида Ўзбекистонда Коронавирусга қарши кураш штаби аъзоси Наргиза Нуруллаева Ўзбекистонда COVID-19 билан қайта касалланиш ҳолатлари қайд этилаётганини маълум қилган эди. Бироқ Коронавирусга қарши кураш штабининг бошқа аъзоси Севара Убайдуллаева бир ҳафтадан кейин штабга коронавирус билан қайта касалланиш ҳолати ҳақида маълумот киритилмаганини айтди.
Сентябрь ойи охирида Ўзбекистоннинг бош санитар инспектори ва Коронавирусга қарши курашиш штаби аъзоси Нурмат Отабеков коронавирус инфекцияси билан қайтадан касалланиш масаласида аҳоли томонидан берилаётган саволларга жавоб қайтариб, «бу эпидемик мавсумда COVID-19 билан қайта касалланиш эҳтимоли йўқ»лигини айтганди.
Изоҳ (0)