Ota-onalar tomonidan II chorakdan barcha o‘quvchilar to‘liq an’anaviy shakldagi ta’limga qaytadimi, degan savollar kelib tushayotgani sababli Xalq ta’limi vazirligi mazkur masala yuzasidan izoh berdi.
“Ma’lumki, maktablarda joriy o‘quv yili ota-onalarning ixtiyori asosida onlayn hamda an’anaviy shaklda yo‘lga qo‘yildi. Biroq, afsuski, bugungi kunda mavjud vaziyatni to‘g‘ri tushunmasdan, ayrim ota-onalar tomonidan farzandini maktabga yubormaslik bilan birga, ‘Onlayn darslar’ vaqtida farzandining dars qilishini ta’minlash o‘rniga, ko‘chada yurishiga yo‘l qo‘yayotgan yoki uni boshqa ishlar bilan band qilib qo‘yish holatlari kuzatilmoqda.
Aytish joizki, farzandlarimizning zoye o‘tayotgan har bir kuni uning ertangi kelajagiga o‘zining salbiy ta’sirini ko‘rsatmay qolmaydi, bolaning maktabda ta’lim olishini hech qanday eng zamonaviy texnologiyalar bilan ham o‘rnini bosib bo‘lmaydi.
Shu sababli hurmatli ota-onalarimizdan uyda bolaning televideniye orqali onlayn ta’lim olishiga to‘laqonli sharoit yaratishning imkoni bo‘lmasa, farzandlarini maktabga yuborishlarini so‘rab qolamiz”, — deyiladi vazirlik izohida.
Qayd etilishicha, bugungi kunda respublikadagi 10 008 ta maktabning deyarli hammasida an’anaviy ta’lim olish imkoniyati yaratilgan. O‘quvchilardan 4,6 million nafari, ya’ni 74 foizi an’anaviy, qolgan 1,6 million nafari, ya’ni 26 foizi onlayn shaklda tahsil olmoqda.Xalq ta’limi vazirligi ta’lim to‘liq an’anaviy shaklga o‘tishi bo‘yicha qaror qabul qilingan taqdirda, vazirlikning rasmiy manbalari orqali ma’lumot berilishini bildirdi. Shuningdek, onlayn ta’lim shakli to‘liq bekor qilingan taqdirda ham, “Onlayn maktab” loyihasi doimiy ravishda davom ettirilishi ko‘zda tutilganini eslatib o‘tdi.
Izoh (0)