“O‘zbekiston Respublikasida xizmat ko‘rsatgan geolog” faxriy unvoni ta’sis etildi

Qonunchilik palatasidagi Ekologik partiya fraksiyasining 2020-yilning 2-noyabr kuni navbatdagi yig‘ilishi bo‘lib o‘tdi, deya xabar bermoqda Parlament axborot xizmati.

Ma’lum qilinishicha, yig‘ilishda yalpi majlisga kiritilishi rejalashtirilayotgan qonun loyihalari, qonun tashabbuskorlari va ishchi guruhlari a’zolari hamda deputatlar ishtirokida muhokama qilindi.

Fraksiya a’zolari “O‘zbekiston Respublikasida xizmat ko‘rsatgan geolog” faxriy unvonini ta’sis etish to‘g‘risida”gi qonuni loyihasi haqida batafsil to‘xtalib, geologiya-qidiruv ishlab chiqarishni rivojlantirish, mineral xomashyo bazasini yaratish va kengaytirish, foydali qazilma konlarini ochish va sanoat yo‘sinda o‘zlashtirishga topshirish, geologiya qidiruv ishlarida ekologik toza, ilg‘or va innovatsion texnologiyalarni ishlab chiqish va tatbiq etish, soha uchun chuqur bilimga ega kadrlarni tayyorlashda muhim ahamiyat kasb etishini ta’kidladi.

Kun tartibidagi barcha masalalar bir ovozdan ma’qullandi va fraksiyaning tegishli qarori qabul qilindi.

Avvalroq O‘zbekistonda Alisher Navoiy ordeni ta’sis etilishi haqida ma’lum qilingandi.