O‘zbekiston Gidrometeorologiya xizmati samarali faoliyat yuritishi uchun oylik maoshlarining kamligi va malakali kadrlarning ketib qolishi kabi masalalarni zudlik bilan hal etish lozim. Bu haqda “O‘zgidromet” tomonidan e’lon qilingan xabarda so‘z boradi.
Gidrometeoxizmat nafaqat iqtisodiyotning qishloq xo‘jaligi, aviatsiya kabi ko‘plab tarmoqlarining faoliyati, balki davlat xavfsizligiga bog‘liq ish. Uning ishi inson hayoti va mulkini himoya qilish, atrof-muhitni monitoringlash va muhofaza qilish, barqaror iqtisodiy-ijtimoiy rivojlanish, mamlakatimiz fuqarolari hayotining farovonligini oshirishga yo‘naltirilgan mamlakat iqtisodiyoti xavfsizligini ta’minlash bilan uzviy bog‘liq.
O‘zbekiston Gidrometeorologiya xizmati markazi respublikada gidrometeorologiya va atrof tabiiy muhit ifloslanishi holatini kuzatish sohasidagi masalalarni hal etish uchun maxsus vakolatli organ hisoblanadi va mamlakat rahbariyati, davlat va xo‘jalik organlari, Qurolli kuchlar va aholini gidrometeorologik ma’lumotlar va atrof-muhit ifloslanishi to‘g‘risidagi ma’lumotlar bilan ta’minlaydi.
Bundan tashqari, O‘zbekistonda AES qurilishi loyihasi uchun hujjatlar tayyorlashda meteorologik va ekologik kuzatuvlar o‘tkazishda ishtirok etib kelmoqda.
Bugungi kunda O‘zbekiston hududida 85 ta meteorologik stansiya, 33 ta agrometeorologik post, 133 ta gidrologik post, 9 ta ko‘l stansiyasi, 12 ta aviameteorologik stansiya va 63 ta atrof-muhitning ifloslanishini kuzatuvchi punkt faoliyat ko‘rsatmoqda.
“Hatto koronavirus pandemiyasi davrida gidrometeorologik ma’lumotlarni olish bilan bog‘liq murakkab vaziyatga qaramasdan ‘O‘zgidromet’ Mintaqaviy telekommunikatsiya markazi sifatida o‘z vazifasini bajarib, Markaziy Osiyo mintaqasining prognostik bo‘linmalarini zarur ma’lumotlar bilan ta’minlab kelmoqda”, — deyiladi xabarda.
Hozirda xalqaro tashkilotlar grantlari, budjet va “O‘zgidromet”ning budjetdan tashqari mablag‘lari hisobiga kuzatuv tarmog‘i zamonaviy asbob-uskunalar bilan bosqichma-bosqich jihozlanmoqda, lekin dunyoda gidrometeorologiya sohasi texnik va texnologik jadal rivojlanayotgan hozirgi davrda bu yetarlicha emas.
“Shu bilan birga, ‘O‘zgidromet’ning samarali faoliyat yuritishi uchun darhol hal etilishi zarur bo‘lgan ayrim muammolar mavjud. 2017-yildan boshlab respublika Gidrometeorologiya xizmati faoliyatini takomillashtirish bo‘yicha bironta normativ hujjat qabul qilinmadi”, — deyiladi xabarda.
“Bugungi kunda ‘O‘zgidromet’ xodimlarining o‘rtacha ish haqi 1,3 million so‘m, hududiy boshqarmalarda 1,2 million so‘m, tuman va shaharlardagi kuzatuv bo‘linmalarda 800 ming so‘mni (!) tashkil etadi. Bu respublikadagi o‘rtacha ko‘rsatkichdan deyarli ikki marta kamdir. Ish haqining pastligi sohaga malakali mutaxassislar, ayniqsa, oliy ta’lim muassasalari bitiruvchilarini jalb qilishga salbiy ta’sir qilmoqda”, — deya qayd etiladi xabarda.
Gidrometeorologiya xizmati xodimlari faoliyatni takomillashtirish bo‘yicha tezkor choralar hamda tarmoqni uzoq muddatli rivojlantirish strategiyasi bo‘yicha qaror qabul qilish zarurligini qayd etgan.
Izoh (0)