27-oktabr kuniga o‘tar kechasi Toshkent shahar Mirzo Ulug‘bek tumani Hamid Olimjon ko‘chasida joylashgan ko‘p qavatli uylarning biridagi ijaraga olingan xonadonda qimor o‘yinlarini tashkil etgan shaxs qo‘lga olindi. Bu haqda Tergov departamenti xabar berdi.
Ma’lumotlarga ko‘ra, J.P. ismli 30 yoshli shaxs ijaraga olgan xonadonida 21 yoshdan 44 yoshgacha bo‘lgan 13 nafar fuqaroning qimor tavakkalchilikka asoslangan kartadan “suvara” o‘yinini o‘ynashiga sharoit yaratib bergan.
Qayd etilishicha, J.P. har bir o‘yinda g‘alaba qozongan shaxslardan 5 ming so‘mdan 10 ming so‘mgacha bo‘lgan miqdordagi pul mablag‘larini olib, moddiy boylik orttirgan.
Tergovga qadar tekshiruv jarayonida 30 yoshli J.P.dan 780 ming so‘m va 200 AQSh dollari miqdoridagi naqd pullar, 6 dona ochilmagan karta hamda 2 dona ochilgan karta ashyoviy dalil tariqasida hujjatlashtirib olingan.
Mazkur holat yuzasidan Mirzo Ulug‘bek tumani bo‘yicha IIO FMB huzuridagi Tergov bo‘limi tomonidan J.P.ga nisbatan Jinoyat kodeksining 278-moddasi 1-qismi (qimor va tavakkalchilikka asoslangan boshqa o‘yinlarni tashkil etish hamda o‘tkazish) bilan jinoyat ishi qo‘zg‘atilgan.
Shuningdek, qimor o‘yinlarida ishtirok etgan shaxslarning harakatlarida Ma’muriy javobgarlik to‘g‘risidagi kodeksning 191-moddasida ko‘rsatilgan huquqbuzarlik alomatlari bo‘lganligi uchun tegishli tartibda hujjatlar rasmiylashtirilib, Ma’muriy ishlar bo‘yicha Mirzo Ulug‘bek tuman sudi tomonidan ularning har biriga nisbatan 5 sutkadan qamoq jazosi berilgan.
Dastlabki tergov jarayonida, J.P. jinoyat ishi bo‘yicha Jinoyat kodeksining 278-moddasi 1-qismi bilan ayblanuvchi tariqasida ishda ishtirok etishga jalb qilingan hamda unga nisbatan garov ehtiyot chorasi qo‘llanilgan.
Hozirda tergov harakatlari olib borilmoqda.
Avvalroq Xorazm viloyatida xonadonda tashkil qilingan qimorxona faoliyatiga chek qo‘yilgani, shuningdek, Qoraqalpog‘istonda qimor o‘ynayotgan 14 nafar shaxs qo‘lga olingani to‘g‘risida xabar berilgandi.
Izoh (0)