Toshkent shahrida 35 ta holatda noqonuniy ravishda qurilish ishlari olib borilayotganligi aniqlangan. Bu haqda Toshkent shahar hokimi Jahongir Ortiqxo‘jayev jurnalistlar bilan bo‘lib o‘tgan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
Anjumanda jurnalistlar tomonidan poytaxtda qancha noqonuniy qurilish holatlari aniqlanganligi yuzasidan savol berildi. Savolga Jahongir Ortiqxo‘jayev “Hozirda shahar bo‘yicha 35 ta noqonuniy qurilish bo‘yicha bizda ma’lumot bor. Agar jurnalistlarda ham shu kabi noqonuniy holatlar haqida ma’lumotlar bor bo‘lsa va uni bizga taqdim etishsa, xursand bo‘lardik”, deya javob berdi.
Toshkent shahar hokimligi qurilish boshqarmasi boshlig‘i vazifasini vaqtincha bajaruvchi Jalol Arashovning ma’lum qilishicha, noqonuniy qurilish holatlarining har biri alohida o‘rganiladi.
“Loyiha-simeta hujjatlariga asosan qurilgan yoki qurilmaganligi, yer ajratish qarorisiz, o‘zboshimchalik bilan, ya’ni bila turib qurilish ishlari boshlanganligi bosqichma-bosqich o‘rganilib, xulosalar chiqariladi. Bu bo‘yicha harakatlar endi boshlanadi”, – dedi Jalol Arashov.
Izoh (0)