SSV shtabi a'zosi koronavirusning bolalarda kattalarga nisbatan yengil kechishining taxminiy sabablarini aytdi

Koronavirusga qarshi kurash shtabi a’zosi Barno Abdusamatova koronavirus infeksiyasining bolalarda kattalarga nisbatan yengil o‘tishi sabablarini ma’lum qildi.

Mutaxassis hozirgi kunda ushbu masala bo‘yicha yagona fikr mavjud emasligi, koronavirus bolalarda ko‘p hollarda yengil shakldagi O‘RVI singari tomoq og‘rig‘i, yo‘tal, burun oqishi va aksirish bilan kechishini bildirdi. Virusning og‘irroq shaklida esa tana harorati 37,5-39 darajagacha ko‘tarilib, holsizlik va bosh og‘rig‘i kuzatiladi.

Shuningdek, Abdusamatova virusning yengil kechishi sabablari qatorida quyidagilarni sanab o‘tgan:

• Kattalarga nisbatan sog‘lom o‘pkaga egaligi tufayli bolalar kasallikning og‘ir shakllariga beriluvchan emas;
• Bolalar, ayniqsa, erta yoshdagi bolalar yomon odatlarga: chekish va boshqalarga ega emasligi;
• Tug‘ma immunitet, ya’ni nospetsifik himoya bolalarda kattalarga nisbatan kuchli bo‘lganligi;
• COVID-19 virusi hujayra ichiga kirishi uchun o‘z oqsilini inson hujayralaridagi S retseptorlar bilan bog‘laydi. Bolalarda ushbu retseptorlarning soni va faolligi kam, ya’ni bolalarda virus kirishi uchun nishonlar kam;
• Bolalar bog‘cha va maktablarda o‘zlari uchun juda ko‘p yangi respirator infeksiyalarga uchraydilar. Buning natijasida ularda bir qator kasalliklarga qarshi antitanalar hosil bo‘lib, ularning miqdori kattalarnikiga nisbatan ko‘p bo‘ladi.

Lekin shuni yodda tutish kerakki, bolalarda ham kasallik o‘tkazilib yuborilsa va shifokorga kech murojaat qilinsa hamda ularda nafas olish tizimining surunkali kasalliklari bo‘lsa, ularda ham og‘ir kechish holatlari kuzatilishi mumkin. O‘limga ham olib kelishi mumkin.

Barno Abdusamatova, Koronavirusga qarshi kurash shtabi a’zosi

Eslatib o‘tamiz, Respublika maxsus komissiyasi va Koronavirusga qarshi kurash shtabi a’zosi Nurmat Otabekov AOKA huzurida tashkil etilgan brifingda O‘zbekistonda yosh bolalar orasida koronavirus kasalligi soni ko‘payishi natijasida ko‘plab bolalar vafot etayotgani xususidagi gaplar haqiqatdan yiroqligini bildirgan.  Avvalroq Barno Abdusamatova ham O‘zbekistonda shu kungacha koronavirusga chalinganlarning 3 932 nafari bolalar bo‘lib, ular orasida o‘lim holatlari qayd etilmagani, bolalar orasida kasallik 7-18 yoshgacha bo‘lganlarda ko‘p uchrayotgani, umumiy kasallanish ko‘rsatkichining 55 foizini bolalar tashkil etishini aytgan.  Koronavirus belgilari bor bolalar 20 kun, belgisizlar 14 kun davomida yuqumli bo‘lishi haqida ham taxminlar borligi ma’lum qilingan.