Toshkentda eshakni Spark’ga bog‘lab, sudrab ketgan haydovchining shaxsi aniqlandi. Bu haqda Telegram’dagi “Ekologouz” kanali xabar berdi.
Ijtimoiy tarmoqlarda Toshkentda haydovchi eshakni Spark’ga bog‘lab, sudrab ketayotgani tasvirlangan video tarqaldi. Ushbu holatni yon-atrofda transport vositasini boshqarib kelayotgan haydovchilar ko‘rib qolgan va suratga olgan. Voqeaga guvoh bo‘lganlardan biri telefon kamerasiga tasvirga olingan videoni ijtimoiy tarmoqqa joylagan. Tarmoq kuzatuvchisi bo‘lgan ayol bu videoni “Mehr va oqibat” jonivorlarni himoya qilish jamiyati nodavlat tashkilotiga yuborgan.
“Mehr va oqibat” hayvonlarni himoya qilish jamiyati ushbu ayanchli holat bo‘yicha surishtiruv olib borishni so‘rab, Toshkent shahar IIBBga murojaat qilgan.
Ta’kidlanishicha, hozirda jonivorga azob bergan haydovchining shaxsi aniqlangan, surishtiruv ishlari olib borilmoqda.
Ma’lumot uchun, jonivorlarga nisbatan johillik bilan munosabatda bo‘lish holatlarida aybdorlar Ma’muriy javobgarlik to‘g‘risidagi kodeksning 111-moddasiga (hayvonlarga nisbatan shafqatsiz munosabatda bo‘lish) muvofiq javobgarlikka tortiladi. Amaldagi Yo‘l harakati qoidalarida ham bunga nisbatan muayyan javobgarlik belgilangan.
Avvalroq Toshkentda uxlayotgan itga qaynoq suv to‘kkan xavfsizlik xodimi ishdan olingani, qo‘shnisining mushugini otgan shaxs javobgarlikka tortilgani, shuningdek, Samarqandda it va mushuklarni zaharlab o‘ldirgan mansabdor shaxslar egallab turgan lavozimlaridan ozod etilgani to‘g‘risida xabar berilgandi.
Izoh (0)