Gruziya bosh vaziri Georgiy Gaxariya koronavirusga topshirgan testi ijobiy natija berdi. Bu haqda Gruziya telekanallariga tayanib, “RBK” xabar bermoqda.
U uyda davolanadi. Hukumat matbuot xizmati xabariga ko‘ra, bosh vazir o‘zini yaxshi his qilmoqda.
Gaxariya qo‘riqchilaridan birida koronavirus aniqlangach 31-oktabr kuni o‘z-o‘zini yakkalash rejimiga o‘tgan edi.
Mansabdor 45 yoshda bo‘lib, hukumatga 2019-yil sentabridan buyon rahbarlik qilib kelmoqda.
Gruziya iqtisodiyot va barqaror rivojlanish vaziri Natiya Turnava hamda Gruziya hukumati ma’muriyati rahbari Natiya Mezvrishvili ham ayni paytda o‘z-o‘zini yakkalash rejimida.
31-oktabr kuni Gruziyada parlament saylovlari bo‘lib o‘tdi. “Gruziya orzusi — demokratik Gruziya” hukmron partiyasi g‘oliblikka erishdi. MSK hisob-kitoblariga ko‘ra, hukmron partiya 48 foizdan ortiqroq ovoz to‘plagan. “Yagona milliy harakat” muxolifat partiyasi esa 27 foizga yaqin ovoz to‘plagan. Gruziya muxolifati saylovlarni soxtalashtirilgan deb hisoblamoqda. Muxolifat partiyalar yetakchilari xalqaro kuzatuvchilardan parlament saylovlarini qonuniy deya tan olmaslikni so‘rash niyatida.
Izoh (0)