30-oktabr kuni Turkiya g‘arbida yuz bergan zilzila qurbonlari soni 100 kishiga yetdi, deb yozadi Meduza mahalliy NTV telekanaliga tayanib.
Qutqaruv xizmatlari bergan so‘nggi ma’lumotlarga ko‘ra, yana 994 kishi turli darajada jarohatlangan, ulardan 147 nafari kasalxonalarda qolmoqda.
30-oktabr kuni tushdan keyin Turkiyaning g‘arbiy qismida 6,6 balli zilzila sodir bo‘ldi. Zilzila epimarkazi Egey dengizida, Izmir viloyatining Seferihisar shahri yaqinida bo‘lgan.
Izmirda kamida 20 ta bino qulab tushgani xabar qilindi. Zilzila kichik sunamini keltirib chiqardi, oqibatda Seferihisarning qirg‘oq ko‘chalarini suv bosdi.
Zilzila kuchi Gretsiya orollarida ham sezildi. Grek seysmologlari uning kuchini 6,9 ball deb baholadi. Zilzila oqibatida Gretsiyaning Samos orolida ikki kishi halok bo‘ldi va 20 kishi jarohat oldi. Orolda 6 oylik favqulodda holat e’lon qilindi.
Turkiya prezidenti Rajab Toyyib Erdo‘g‘on davlatning barcha zarur resurslari zilzila oqibatlarini bartaraf qilishga yo‘naltirilishini aytdi. Davlat rahbari boshpanasidan ajralgan fuqarolarning barchasiga yangi xonadonlar berilishini ta’kidladi.
Izoh (0)