Autsayderga aylangan favoritlar to‘qnashuvi. “Real” — “Inter” uchrashuvi haqida

Futbol bo‘yicha Yevropa Chempionlar Ligasining 3-turida B guruhi favoritlari “Real” va “Inter” jamoalari Madridda o‘zaro bahsga kirishadi.

Ta’kidlash kerak, har ikki jamoa Chempionlar Ligasida mavsumni muvaffaqiyatli boshlay olmadi. Ortda qolgan ikki turdan keyin jamoalar uchinchi va to‘rtinchi o‘rinda bormoqda. “Real” hisobida bir ochko bor, agar Kazemiro va Karim Benzema “Borussiya M”ga qarshi o‘yinning so‘nggi daqiqalarida jamoani mag‘lubiyatdan qutqarib qolmaganida shu ochko ham bo‘lmas edi.

“Inter” esa ikki o‘yinda ikkita durang qayd etdi va ular bir-biridan farqli ravishda qo‘lga kiritildi. Milanliklar “Borussiya M”ga qarshi o‘yinda (2:2) so‘nggi daqiqalardagi gol evaziga mag‘lubiyatdan qutulib qolgan bo‘lsa, “Shaxtyor” bilan uchrashuvda (0:0) raqib himoyasini yorib o‘ta olmadi.

“Real”

Madridliklar bu o‘yinda nominal o‘ng qanot himoyachisiz o‘ynaydi. Dani Karvaxal va Alvaro Odriosola jarohatini tiklash bilan band, shuningdek, universal himoyachi Nacho ham oktabr oxirida safdan chiqqan. Ushbu pozitsiyada ishonchli harakat qilib kelayotgan Lukas Vaskes ham avvalgi o‘yinda mushaklarini shikastlab oldi, biroq hujumkor yarim himoyachisi “Inter”ga qarshi o‘yin qaydnomasidan o‘rin oldi. Zinedin Zidanda Ferlan Mendi varianti qolmoqda. Fransiyalik futbolchi o‘zini noqulay his qilsa-da qarama-qarshi qanotda to‘p surishga majbur bo‘lishi mumkin.

Zidan mavsumning u qadar muvaffaqiyatli boshlay olmaganidan xavotirda emas. Uning asosiy muammolaridan biri to‘purar hujumchining yo‘qligi. Bu muammo Krishtianu Ronaldu ketganidan buyon ispan grandini qiynab kelmoqda. Katta futbolga qadam bosishda qiynalayotgan Vinisius va Rodrigo, jarohatga moyil Eden Azar, kuchsiz o‘yin ko‘rsatayotgan Luka Yovich va yetakchilikni o‘z qo‘liga ololmayotgan Marko Asensio mazkur muammoni yopishga xalal bermoqda.

Bu holat o‘tgan mavsum kabi yangi mavsumda ham jamoani ta’qib qilmoqda. Eski gvardiya vakillari Karim Benzema, Serxio Ramos va markaziy yarim himoyachilar “qaymoqranglilar”ning joniga oro kirishda davom etmoqda. Biroq “Real”ning so‘nggi o‘yinlari muxlislarga biroz optimizm ulashdi. “El-Klasiko”dagi g‘alaba, Myunxengladbaxdagi iroda va “Ueska”ning osonlikcha tor-mor etilishi (ishqibozlar uzoq kutgan holat) murabbiy tomon yog‘dirilayotgan tanqid toshlarini biroz kamaytirdi. Bundan tashqari Azar nihoyat, asosiy tarkibda maydonga tushdi va bir yil deganda “Real” safida to‘p kiritishga erishdi.

“Inter”

Milanliklarda o‘yin oldidan katta yo‘qotish bor. Romelu Lukaku Madriddagi o‘yinni aniq o‘tkazib yuboradi. “Inter” matbuot xizmatining ma’lum qilishicha, belgiyalik futbolchi Kiyevdagi uchrashuvda chap soni mushaklaridan jarohat olgan. Jamoa futbolchining “Atalanta”ga qarshi kechadigan yakshanba kungi o‘yinga qadar tiklanishiga umid qilmoqda. Lukaku Antonio Konte jamoasining hujumidagi eng asosiy figura hisoblanadi. Romelu joriy mavsum faqat ikki marta maydonni golsiz tark etdi — “Latsio” va “Shaxtyor”ga qarshi o‘yinlarda.

Hujumda yaratilgan imkoniyatlardan foydalana olmaslik — jamoaning asosiy muammolaridan biri. “Inter” so‘nggi o‘yinlarda natija borasida ham muammolarga duch kelmoqda: birgina “Jenoa” ustidan qozonilgan (2:0), Milan derbisidagi mag‘lubiyat (1:2) va to‘rtta durang. Ularning deyarli barchasida (“Milan”ga qarshi o‘yindan tashqari, albatta) Konte jamoasi o‘yin tizginini o‘z qo‘lida ushlab turdi, bir qator vaziyatlar yaratdi, biroq ularni golga aylantirishda sermahsullik ko‘rsata olmadi.

Bu muammoning ramzi sifatida Lautaro Martinesni ko‘rsatish mumkin. 2019/20-yilgi mavsum avvalida argentinalik futbolchi raqiblar darvozasi oldida xavfli o‘yini va maydondagi foydali harakatlari bilan ajralib turardi. Biroq 2020-yil kirib kelishi bilan bu xususiyatlar o‘z-o‘zidan yo‘q bo‘lib qolgandek. So‘nggi bor Lautaro oktabr oyi boshida “Latsio” darvozasini ishg‘ol qilgandi.

O‘zaro o‘yinlar tarixi

Mazkur jamoalar shu vaqtga qadar o‘zaro 18 marta to‘qnash kelgan. Ularning 8 tasida milanliklarning qo‘li baland kelgan bo‘lsa, yetti o‘yinda Madrid shahri jamoasi g‘alabaga erishgan. Yana uchta o‘yin durang bilan tugagan, to‘plar nisbati — 24:21 “Real” foydasiga.

Yevrokuboklardagi so‘nggi to‘qnashuv esa 1998-yilga to‘g‘ri keladi. O‘sha vaqtda ham bir guruhdan joy olgan jamoalar o‘z uyidagi o‘yinlarni g‘alaba bilan yakunlangandi.

Prinsipial to‘qnashuvlar

Mazkur o‘yinda Ashraf Hakimi sobiq jamoasiga qarshi maydonga tushadi. Yozda marokashlik futbolchini sotib yuborgan “Real” ayni damda uning pozitsiyasida katta muammolarga duch kelmoqda. Bu Hakimiga yanada ko‘proq motivatsiya berishi tayin.

Bir necha mavsum “Barselona” safida to‘p tepgan Arturo Vidal bu safar “qora-ko‘k” libosda Madrid jamoasiga qarshi maydonga tushadi. O‘yindan avval chililik futbolchi “Real” ustidan qozonilgan g‘alabani “Inter” va “Barselona” muxlislari bilan birga nishonlashga umid bildirishini aytib o‘tdi.

Taxminiy tarkiblar

Zidan qanday tarkib tanlashi deyarli aniq, faqat ikki pozitsiya bo‘yicha savollar bor. O‘ng qanot himoyasida ishonchni oqlay olmagan Mendi harakat qiladimi yoki Zizu Vaskesning sog‘lig‘ini xavf ostiga qo‘yib bo‘lsa-da chiziqni ishonchli qo‘lga topshiradimi? Bizningcha, Vaskes o‘yinni asosiy tarkibda boshlaydi. Chap qanot hujumida Azar va Vinisius variantlari mavjud. Belgiyalik futbolchining so‘nggi o‘yindagi ishonchli harakatlarini inobatga oladigan bo‘lsak, bugun aynan u boshlang‘ich tarkibdan o‘rin olsa kerak.

Hujum chizig‘ida muammolarga duch kelgan Konte Lautaroga sherik sifatida Ivan Perishichni tushirishi katta ehtimol. Jarohatidan forig‘ bo‘lib, safga qaytgan Aleksis Sanches keyinchalik o‘yinni kuchaytirish maqsadida maydonga tushirilishi mumkin.