Аутсайдерга айланган фаворитлар тўқнашуви. «Реал» — «Интер» учрашуви ҳақида

Футбол бўйича Европа Чемпионлар Лигасининг 3-турида B гуруҳи фаворитлари «Реал» ва «Интер» жамоалари Мадридда ўзаро баҳсга киришади.

Таъкидлаш керак, ҳар икки жамоа Чемпионлар Лигасида мавсумни муваффақиятли бошлай олмади. Ортда қолган икки турдан кейин жамоалар учинчи ва тўртинчи ўринда бормоқда. «Реал» ҳисобида бир очко бор, агар Каземиро ва Карим Бензема «Боруссия М»га қарши ўйиннинг сўнгги дақиқаларида жамоани мағлубиятдан қутқариб қолмаганида шу очко ҳам бўлмас эди.

«Интер» эса икки ўйинда иккита дуранг қайд этди ва улар бир-биридан фарқли равишда қўлга киритилди. Миланликлар «Боруссия М»га қарши ўйинда (2:2) сўнгги дақиқалардаги гол эвазига мағлубиятдан қутулиб қолган бўлса, «Шахтёр» билан учрашувда (0:0) рақиб ҳимоясини ёриб ўта олмади.

«Реал»

Мадридликлар бу ўйинда номинал ўнг қанот ҳимоячисиз ўйнайди. Дани Карвахаль ва Альваро Одриосола жароҳатини тиклаш билан банд, шунингдек, универсал ҳимоячи Начо ҳам октябрь охирида сафдан чиққан. Ушбу позицияда ишончли ҳаракат қилиб келаётган Лукас Васкес ҳам аввалги ўйинда мушакларини шикастлаб олди, бироқ ҳужумкор ярим ҳимоячиси «Интер»га қарши ўйин қайдномасидан ўрин олди. Зинедин Зиданда Ферлан Менди варианти қолмоқда. Франциялик футболчи ўзини ноқулай ҳис қилса-да қарама-қарши қанотда тўп суришга мажбур бўлиши мумкин.

Зидан мавсумнинг у қадар муваффақиятли бошлай олмаганидан хавотирда эмас. Унинг асосий муаммоларидан бири тўпурар ҳужумчининг йўқлиги. Бу муаммо Криштиану Роналду кетганидан буён испан грандини қийнаб келмоқда. Катта футболга қадам босишда қийналаётган Винисиус ва Родриго, жароҳатга мойил Эден Азар, кучсиз ўйин кўрсатаётган Лука Йович ва етакчиликни ўз қўлига ололмаётган Марко Асенсио мазкур муаммони ёпишга халал бермоқда.

Бу ҳолат ўтган мавсум каби янги мавсумда ҳам жамоани таъқиб қилмоқда. Эски гвардия вакиллари Карим Бензема, Серхио Рамос ва марказий ярим ҳимоячилар «қаймоқранглилар»нинг жонига оро киришда давом этмоқда. Бироқ «Реал»нинг сўнгги ўйинлари мухлисларга бироз оптимизм улашди. «Эль-Класико»даги ғалаба, Мюнхенгладбахдаги ирода ва «Уэска»нинг осонликча тор-мор этилиши (ишқибозлар узоқ кутган ҳолат) мураббий томон ёғдирилаётган танқид тошларини бироз камайтирди. Бундан ташқари Азар ниҳоят, асосий таркибда майдонга тушди ва бир йил деганда «Реал» сафида тўп киритишга эришди.

«Интер»

Миланликларда ўйин олдидан катта йўқотиш бор. Ромелу Лукаку Мадриддаги ўйинни аниқ ўтказиб юборади. «Интер» матбуот хизматининг маълум қилишича, бельгиялик футболчи Киевдаги учрашувда чап сони мушакларидан жароҳат олган. Жамоа футболчининг «Аталанта»га қарши кечадиган якшанба кунги ўйинга қадар тикланишига умид қилмоқда. Лукаку Антонио Конте жамоасининг ҳужумидаги энг асосий фигура ҳисобланади. Ромелу жорий мавсум фақат икки марта майдонни голсиз тарк этди — «Лацио» ва «Шахтёр»га қарши ўйинларда.

Ҳужумда яратилган имкониятлардан фойдалана олмаслик — жамоанинг асосий муаммоларидан бири. «Интер» сўнгги ўйинларда натижа борасида ҳам муаммоларга дуч келмоқда: биргина «Женоа» устидан қозонилган (2:0), Милан дербисидаги мағлубият (1:2) ва тўртта дуранг. Уларнинг деярли барчасида («Милан»га қарши ўйиндан ташқари, албатта) Конте жамоаси ўйин тизгинини ўз қўлида ушлаб турди, бир қатор вазиятлар яратди, бироқ уларни голга айлантиришда сермаҳсуллик кўрсата олмади.

Бу муаммонинг рамзи сифатида Лаутаро Мартинесни кўрсатиш мумкин. 2019/20 йилги мавсум аввалида аргентиналик футболчи рақиблар дарвозаси олдида хавфли ўйини ва майдондаги фойдали ҳаракатлари билан ажралиб турарди. Бироқ 2020 йил кириб келиши билан бу хусусиятлар ўз-ўзидан йўқ бўлиб қолгандек. Сўнгги бор Лаутаро октябрь ойи бошида «Лацио» дарвозасини ишғол қилганди.

Ўзаро ўйинлар тарихи

Мазкур жамоалар шу вақтга қадар ўзаро 18 марта тўқнаш келган. Уларнинг 8 тасида миланликларнинг қўли баланд келган бўлса, етти ўйинда Мадрид шаҳри жамоаси ғалабага эришган. Яна учта ўйин дуранг билан тугаган, тўплар нисбати — 24:21 «Реал» фойдасига.

Еврокубоклардаги сўнгги тўқнашув эса 1998 йилга тўғри келади. Ўша вақтда ҳам бир гуруҳдан жой олган жамоалар ўз уйидаги ўйинларни ғалаба билан якунланганди.

Принципиал тўқнашувлар

Мазкур ўйинда Ашраф Ҳакими собиқ жамоасига қарши майдонга тушади. Ёзда марокашлик футболчини сотиб юборган «Реал» айни дамда унинг позициясида катта муаммоларга дуч келмоқда. Бу Ҳакимига янада кўпроқ мотивация бериши тайин.

Бир неча мавсум «Барселона» сафида тўп тепган Артуро Видаль бу сафар «қора-кўк» либосда Мадрид жамоасига қарши майдонга тушади. Ўйиндан аввал чилилик футболчи «Реал» устидан қозонилган ғалабани «Интер» ва «Барселона» мухлислари билан бирга нишонлашга умид билдиришини айтиб ўтди.

Тахминий таркиблар

Зидан қандай таркиб танлаши деярли аниқ, фақат икки позиция бўйича саволлар бор. Ўнг қанот ҳимоясида ишончни оқлай олмаган Менди ҳаракат қиладими ёки Зизу Васкеснинг соғлиғини хавф остига қўйиб бўлса-да чизиқни ишончли қўлга топширадими? Бизнингча, Васкес ўйинни асосий таркибда бошлайди. Чап қанот ҳужумида Азар ва Винисиус вариантлари мавжуд. Бельгиялик футболчининг сўнгги ўйиндаги ишончли ҳаракатларини инобатга оладиган бўлсак, бугун айнан у бошланғич таркибдан ўрин олса керак.

Ҳужум чизиғида муаммоларга дуч келган Конте Лаутарога шерик сифатида Иван Перишични тушириши катта эҳтимол. Жароҳатидан фориғ бўлиб, сафга қайтган Алексис Санчес кейинчалик ўйинни кучайтириш мақсадида майдонга туширилиши мумкин.