Toshkent viloyati Angren shahridagi “Navbahor” MFYga qarashli Dukent qishlog‘i ko‘chalarida 1-noyabr kuni kechasi aylanib yurgan ayiq Ekologiya va atrof-muhitni muhofaza qilish davlat qo‘mitasi hamda ichki ishlar organlari xodimlari tomonidan ushlanib, 3-noyabr kuni yovvoyi tabiatga qo‘yib yuborildi. Bu haqda Ekologiya va atrof-muhitni muhofaza qilish davlat qo‘mitasi xabar berdi.
Qo‘mita tomonidan ma’lum qilinishicha, 2-noyabr kuni ijtimoiy tarmoqlarda Angren shahri Dukent qo‘rg‘onida joylashgan aholi yashash punktida ayiq yurganligi haqidagi video tarqalganidan keyin Davlat ekologiya qo‘mitasi xodimlari hamda IIV xodimlari va mutaxassislar manzilga yetib kelgan hamda fuqarolar xavfsizligini ta’minlash maqsadida ayiq ushlanib, xavfsiz joyga joylashtirilgan.
Mutaxassislarning ta’kidlashicha, 2020-yil erta bahorda tog‘da olcha, olma va shunga o‘xshash mevalarni sovuq urib ketganligi sababli ayiq ozuqa izlab, aholi yashash joylarigacha tushib kelgan.
Ma’lum qilinishicha, Davlat ekologiya qo‘mitasi, Falcon Hunting Solutions MChJ va Toshkent hayvonot bog‘i xodimlari ishtirokidagi guruh a’zolari tomonidan ayiqqa tibbiy yordam ko‘rsatish bilan bog‘liq tezkor chora-tadbirlar ko‘rilib, ayiq 3-noyabr kuni yovvoyi tabiatga qo‘yib yuborildi.
Eslatib o‘tamiz, “O‘zbekiston 24” telekanalining “Fakt 24” dasturi ayiqning aholi orasida yurishi bilan bog‘liq mazkur holatni o‘rgangandi va ayiq 2-oktabr kuni otib o‘ldirilganini ma’lum qilgandi. Biroq Toshkent viloyati IIBB matbuot kotibi Bobur To‘laganov “Fakt 24” dasturi orqali otib qo‘yilgani aytilgan qo‘ng‘ir ayiq haqidagi xabar haqiqatdan yiroqligini, ayiq o‘ldirilmaganini bildirgandi.
Izoh (0)