Namangan viloyati hokimi Shavkatjon Abdurazzoqov Italiyaning Opera kompaniyasi vakillarini qabul qildi. Bu haqda “Daryo” muxbiri Azizbek Abduvaliyev xabar bermoqda.
Kompaniya To‘raqo‘rg‘on tumanida endokrinologiya markazini ochishni rejalashtirmoqda. Markazning loyiha qiymati 8,5 million yevro bo‘lib, 18 oyda qurib bitkazilishi ko‘zda tutilgan.
Farg‘ona vodiysida yagona tibbiy muassasa 4 ta operatsiya bo‘limidan iborat bo‘ladi. Dastlab 40 o‘rinli bo‘ladi, keyinchalik esa bu ko‘rsatkich 10 baravar oshiriladi. Bu yerda yil davomida 12 ming kishi davolanishi mumkin.
Kompaniya direktori Paolo de Anjelisga ko‘ra, endokrinologiya markazi O‘zbekiston va Italiya o‘rtasidagi ilk tibbiy loyiha hisoblanadi. Uning doirasida italiyalik mutaxassislar tomonidan mahalliy shifokorlarni o‘qitilishi ham ko‘zda tutilgan.
“Bu loyihani to‘liq qo‘llab-quvvatlaymiz va amalga oshirilishi uchun barcha sharoitlarni yaratib berishga tayyormiz. Chunki endokrinologiya yo‘nalishidagi bemorlarimiz poytaxtdagi klinikalar, hatto chet ellarga ham borib davolanib kelmoqda. Qolaversa, bu tibbiy turizm borasida ham yangi qadam bo‘ladi”, — dedi viloyat hokimi.
Izoh (0)