O‘zbekiston bosh vaziri Abdulla Aripov 2-noyabr kuni Qozog‘iston bosh vaziri o‘rinbosari Roman Sklyar boshchiligidagi hukumat delegatsiyasi vakillarini qabul qildi. Bu haqda O‘zbekiston hukumati matbuot xizmati xabar berdi.
Ta’kidlanishicha, uchrashuvda Oliy va yuqori darajada erishilgan kelishuvlarning joriy holati va istiqboli muhokama qilinib, O‘zbekiston—Qozog‘iston munosabatlarining dolzarb masalalari ko‘rib chiqilgan.
“Yaxshi qo‘shnichilik, strategik sheriklik va ko‘p qirrali hamkorlikni yanada mustahkamlash, savdo-iqtisodiy, tibbiyot, ta’lim, transport va logistika sohalari bo‘yicha yangi istiqbolli loyihalarni birgalikda amalga oshirish yuzasidan o‘zaro fikr almashildi”, — deyiladi xabarda.
“O‘zbekiston biz uchun mintaqadagi asosiy savdo sherigimiz. 2020-yilda o‘zaro tovar almashish hajmini 5 milliard dollarga yetkazish rejalashtirilgan edi, biroq pandemiya sabab buni amalga oshirish mushkul. 9 oy davomida o‘zaro savdo hajmining pasayishi 16,5 foizni tashkil etdi. Biz tomondan amalga oshirilayotgan eksport kam foizlarda qisqargan bo‘lsa-da, O‘zbekiston importi 40 foizga qisqarib ketdi”, — deb yozadi Qozog‘iston Savdo va integratsiya vaziri Baxit Sultonov o‘zining Facebook’dagi sahifasiga.
Baxit Sultonov O‘zbekistondagi hamkasblariga Qozog‘iston tomonidan o‘zbek bozoriga yetkazib berilishi mumkin bo‘lgan turli trubalar, metalloprokat, avtomobillar, kimyoviy va neft kimyosi mahsulotlari, mashinasozlik, farmatsevtika va oziq-ovqat sanoati kabi yana 64 ta tovar pozitsiyalarini taklif etgan.
Vazirning ta’kidlashicha, Qozog‘iston “nafaqat savdo qilishni, balki tashqi bozorlarga chiqishda hamkorlikni yo‘lga qo‘yishni ham xohlamoqda”. Shu sababli ikki mamlakat ham Xalqaro savdo-iqtisodiy hamkorlik markazini (XSIHM) yaratish tashabbusini ilgari surgan. Qozog‘iston XSIHMga nafaqat infratuzilmaga ega transchegaraviy ulgurji va chakana savdo obyekti sifatida, balki Yevrosiyo tovarlari almashinuvi tizimining muhim savdo-logistika markazi sifatida qaramoqda. Ulgurji tarqatish markazlari va O‘zbekistonning agro-logistika markazlari ham ushbu yirik tizimning tarkibiy qismiga aylanishga mo‘ljallangan.
“Umuman olganda, barcha chegara xizmatlarining ishini Aholiga xizmat ko‘rsatish yagona darchalari prinsipi bo‘yicha markazlashtirish tajribasini ishlab chiqish kerak”, — deydi Baxit Sultonov.
Savdo va integratsiya vaziri, shuningdek, tomonlar “to‘siqlarni yechish” masalasini ham muhokama qilganini bildirgan.
“Hamkasblar bilan Toshkentning 2009-yil 20-noyabrdagi MDHdagi tovarlar ishlab chiqarilgan mamlakatni aniqlash qoidalariga qo‘shilish, O‘zbekistonning aksiz siyosatini liberallashtirish jarayoni va O‘zbekiston bozorida Qozog‘iston brendlaridan foydalangan holda soxta un mahsulotlarining tez-tez paydo bo‘lib turishi masalalari haqida gaplashdik”, — deydi Baxit Sultonov.
2020-yil sentabr holatiga ko‘ra, O‘zbekistonning tashqi savdo aylanmasi Xitoy (16,8 foiz) va Rossiyadan (14,8 foiz) keyin Qozog‘iston hisobiga to‘g‘ri keladi — 7,3 foiz yoki 2 milliard dollardan ortiqroq.
Izoh (0)