Тошкент вилояти Ангрен шаҳридаги «Навбаҳор» МФЙга қарашли Дукент қишлоғи кўчаларида 1 ноябрь куни кечаси айланиб юрган айиқ Экология ва атроф-муҳитни муҳофаза қилиш давлат қўмитаси ҳамда ички ишлар органлари ходимлари томонидан ушланиб, 3 ноябрь куни ёввойи табиатга қўйиб юборилди. Бу ҳақда Экология ва атроф-муҳитни муҳофаза қилиш давлат қўмитаси хабар берди.
Қўмита томонидан маълум қилинишича, 2 ноябрь куни ижтимоий тармоқларда Ангрен шаҳри Дукент қўрғонида жойлашган аҳоли яшаш пунктида айиқ юрганлиги ҳақидаги видео тарқалганидан кейин Давлат экология қўмитаси ходимлари ҳамда ИИВ ходимлари ва мутахассислар манзилга етиб келган ҳамда фуқаролар хавфсизлигини таъминлаш мақсадида айиқ ушланиб, хавфсиз жойга жойлаштирилган.
Мутахассисларнинг таъкидлашича, 2020 йил эрта баҳорда тоғда олча, олма ва шунга ўхшаш меваларни совуқ уриб кетганлиги сабабли айиқ озуқа излаб, аҳоли яшаш жойларигача тушиб келган.
Маълум қилинишича, Давлат экология қўмитаси, Falcon Hunting Solutions МЧЖ ва Тошкент ҳайвонот боғи ходимлари иштирокидаги гуруҳ аъзолари томонидан айиққа тиббий ёрдам кўрсатиш билан боғлиқ тезкор чора-тадбирлар кўрилиб, айиқ 3 ноябрь куни ёввойи табиатга қўйиб юборилди.
Эслатиб ўтамиз, «Ўзбекистон 24» телеканалининг «Факт 24» дастури айиқнинг аҳоли орасида юриши билан боғлиқ мазкур ҳолатни ўрганганди ва айиқ 2 октябрь куни отиб ўлдирилганини маълум қилганди. Бироқ Тошкент вилояти ИИББ матбуот котиби Бобур Тўлаганов «Факт 24» дастури орқали отиб қўйилгани айтилган қўнғир айиқ ҳақидаги хабар ҳақиқатдан йироқлигини, айиқ ўлдирилмаганини билдирганди.
Изоҳ (0)