Futbol bo‘yicha Rossiya Premyer Ligasining 13-tur o‘yinlari 1-noyabr, yakshanba kuni yakunlandi.
“Tambov” jamoasi o‘z maydonida “Dinamo”ni qabul qildi. Dastlab moskvaliklar 8-daqiqada Daniil Lesovoyning golidan keyin oldinga o‘tib oldi. Ikkinchi bo‘lim debyutida maydon egalari safida ikkita chetlatish sodir bo‘ldi. Avvaliga Anton Kilin ikkinchi sariq kartochkasini olib maydonni tark etgan bo‘lsa, oradan besh daqiqa o‘tib Guram Tetrashvili ochiqdan-ochiq qo‘polligi uchun qizilga loyiq ko‘rildi.
64-daqiqada mezbonlar penalti ishlab olishga erishdi, uni German Onugxa muvaffaqiyatli ijro etdi. Shundan keyin tashabbus to‘liq poytaxt jamoasiga o‘tdi. So‘nggi daqiqalarda endi “Tambov” darvozasi tomon penalti belgilandi. 11 metrlik jarima zarbasini Nikolay Komlichenko aniq bajardi. So‘nggi hujum vaqtida maydon egalari yana bir bor penalti ishlab oldi, biroq Onugxa bu safar mo‘ljaldan adashdi.
Ushbu bahsda “Tambov”da ijarada o‘ynayotgan o‘zbekistonlik yarim himoyachi Jasur Jaloliddinov zaxirada qoldi.
“Zenit” safarda “Ximki”ni taslim etdi. SSKA esa Alan Zagoyevning goli evaziga “Rotor”ni yengdi va musobaqa peshqadamiga aylandi.
RPL
13-tur bahslari
1-noyabr, yakshanba
“Tambov” — “Dinamo” 1:2
Gollar: 0:1 – 8 Lesovoy, 1:1 – 64, penalti Onugxa, 1:2 – 90+3, penalti Komlichenko.Chetlatishlar: Kilin (54), Tetrashvili (59) — “Tambov”.
“Ufa” — “Ural” 1:2
Gollar: 0:1 – 27 Bikfalvi, 0:2 – 38, penalti Bikfalvi, 1:2 – 61 Andrich.“Ximki” — “Zenit” 0:2
Gollar: 0:1 – 18 Mostovoy, 0:2 – 78 Yeroxin.“Rotor” — SSKA 0:1
Gol: 0:1 – 41 Zagoyev.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)