Aralash jang san’atlari bo‘yicha UFC’ning yengil vazn toifasidagi chempioni Habib Nurmagomedovning ustozi Xavyer Mendes 1-noyabr, yakshanba kuni Toshkentda o‘zbekistonlik sportchilar uchun master-klass o‘tkazdi. Bu haqida O‘zbekiston MMA assotsiatsiyasi “Daryo”ga ma’lum qildi.
Xavyer Mendes Toshkentdagi sport klubida bo‘lib, u yerda taekvondo, dzyudo va boks bilan shug‘ullanuvchi o‘zbekistonlik sportchilar va ularning murabbiylari bilan uchrashgan. Mendes va sportchilar o‘rtasidagi suhbat ikki soatdan ortiq davom etgan.
Shundan so‘ng taniqli murabbiy ishtirokida sportchilar uchun master-klass o‘tkazilgan.
MMA assotsiyasining ta’kidlashicha, O‘zbekistonga Xavyer Mendes kabi taniqli xalqaro toifadagi murabbiylarning tashrifi davom etadi.
Ma’lumot uchun, Xaver Mendes AKA sport zali (American Kickboxing Academy) asoschisi hisoblanadi. Ushbu maskanda Xavyer Mendes va uning hamkasblari o‘z shogirdlarini turli musobaqalarga tayyorlab keladi. Mendesning shogirdlaridan Habib Nurmagomedov, Daniel Kormye, Lyuk Rokhold, Keyn Velaskes, Frenk Shemrok kabi jangchilar UFC promoushenida chempionlikka erishgan.
Eslatib o‘tamiz, O‘zbekistonda MMA assotsiatsiyasi 2019-yil noyabrida tashkil etilgandi. Uning ilk rahbari esa Otabek Umarov bo‘lgandi. 2020-yil 14-sentabrida esa Umarovning ishdan ketganligi haqida xabar berilgandi. MMA assotsiatsiyasining ayni damdagi rahbari Mudofaa vaziri Bahodir Qurbonov hisoblanadi.
Mavzuga doir:
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)