Ўзбекистондаги умумтаълим мактабларида 2021/2022-ўқув йилидан бошлаб умумий ўқув соатлари доирасида жисмоний тарбия фани барча синфларда ҳафтада 2 соатдан ўқитиш йўлга қўйилади. Бу ҳақда «Соғлом турмуш тарзини ҳаётга кенг татбиқ этиш ва оммавий спортни янада ривожлантириш чора-тадбирлари тўғрисида» 30 октябрь куни имзоланган Президент фармонида қайд этилган.
Фармонда белгиланишича, 2021 йилда умумтаълим мактабларига 50 та спорт зали қурилиши учун 100 миллиард сўм, спорт таълим муассасаларига 48 та спорт иншооти қурилиши учун 400 миллиард сўм ажратилади.
2021 йил 10 апрелга қадар 2022—2023 йилларга мўлжалланган дастур ишлаб чиқилиб, шу асосда умумтаълим мактаблари спорт заллари билан тўлиқ таъминланади, ҳар бир туман(шаҳар)да моддий-техника базасига эга болалар ва ўсмирлар спорт мактаблари ҳамда бошқа жисмоний тарбия ва спорт муассасаларининг спорт иншоотлари қурилади ва жиҳозланади.
Шунингдек, икки ой муддатда умумтаълим, профессионал ва олий таълим муассасаларида дарслар оралиғида (катта танаффус вақтида) «Спорт дақиқаси» жисмоний машқлари амалиётга жорий этилади. Дарслар бошланишидан олдин эса 2 дақиқа нафас олиш машқлари ўтказилади.
Мавзуга доир: Ўзбекистондаги мактаблар ва олий таълим муассасаларида дарслар оралиғида жисмоний машқлар ўтказилади
Уч ой муддатда болаларнинг жисмоний ривожланишини рақамлаштирилган дастур ёрдамида мониторинг қилиш тизими ишлаб чиқилади.
2021 йил 1 мартга қадар тиббиёт ходимлари томонидан болаларнинг соғлиғини инобатга олган ҳолда, жисмоний тарбия билан шуғулланиши устидан назорат ўрнатилади. Болалар саломатлиги асосида тиббий-соғломлаштириш гуруҳларига ажратилиб, шунга қараб жисмоний чиниқтириш миқдори белгиланади.
Изоҳ (0)