Sikstin kapellasi Uyg‘onish davrining muhim yodgorligi hisoblanadi. Mikelanjelo tomonidan to‘rt yil davomida chizilgan devor va shiftlarni ko‘rish qanchalik zavqli ekanini bilasizmi? Keling, kitoblardagi dunyoga o‘xshash, bir qarashda o‘ziga maftun qilib qo‘yadigan ko‘hna tarix tomon birgalikda sayohat qilamiz.
2-noyabr – ushbu san’at asari ilk bor namoyish qilingan sana. “Daryo” shu munosabat bilan eng ajabtovur va hayratlanarli san’at asarlari tasvirlangan Sikstin kapellasi fotojamlanmasini e’tiboringizga havola etadi.
Sikstin kapellasi Vatikanda joylashgan sobiq uy cherkovi bo‘lib, 1473–1481-yillarda arxitektor Jorj de Dolchi tomonida Rim papasi Siksta IV topshirig‘i bilan qurilgan, shuning uchun ham tarixiy obidaga uning nomi berilgan. Kapella devorlari 1481–1483-yillarda Sandro Botichelli, Pinturikko va boshqa rassom-haykaltaroshlar ishlagan san’at asarlari bilan bezatilgan. Lorenso Medichi va papa o‘rtasida ittifoq paydo bo‘lganidan keyin florensiyalik rassomlar Rimga taklif etilib, o‘sha yillarda umbriyalik rassomlar bilan hamkorlikda Kapella devorlariga jilo berilgan.
Ular Botichelli, Perudjino, Girlandayo va Kozimo Roselli hamda ularning yordamchilari – Pinturikkio, Sinorelli, Bartolomeo della Gatta, Davida Girlandayo, Pyero de Kazimo, Byadjo d'Antonio kabi tasviriy san’at vakillari edi. Rassomlar barpo etgan freskalar soni 16 ta bo‘lib, bizgacha 12 tasi saqlanib qolgan.
Bugungi kunda kapella muzey sifatida faoliyat ko‘rsatish bilan birgalikda, yangi papalarni tayinlash marosimi o‘tkazilishi uchun ham foydalaniladi. Sikstin kapellasida dunyoga mashhur musiqachi erkaklar xori faoliyat yuritadi. Bu xor katolik cherkovining Papa kapellasi nomi bilan dunyo bo‘ylab shuhrat qozongan. Hozirda Papa kapellasi 1471-yil Sikst IV tomonidan asos solingan Schola cantorum truppasining davomchilari hisoblanib, 24 a’zodan iborat.
Zamonaviy Sikstin kapellasi xori faqat papalik maktabi kompozitsiyalarini emas, balki XX va XXI asr kompozitorlari ijodidan ham chiqishlar qiladi. Tarixiy xor bilan bugungi xorning yagona bog‘liqligi bu gender cheklovlari hisoblanadi.
Quyida Sikstin kapellasining fotosuratlari bilan tanishishingiz mumkin.
Izoh (0)