Фотогалерея: Уйғониш даврининг буюк ёдгорлиги – Сикстин капелласи

Сикстин капелласи Уйғониш даврининг муҳим ёдгорлиги ҳисобланади. Микеланжело томонидан тўрт йил давомида чизилган девор ва шифтларни кўриш қанчалик завқли эканини биласизми? Келинг, китоблардаги дунёга ўхшаш, бир қарашда ўзига мафтун қилиб қўядиган кўҳна тарих томон биргаликда саёҳат қиламиз.

2 ноябрь – ушбу санъат асари илк бор намойиш қилинган сана. «Дарё» шу муносабат билан энг ажабтовур ва ҳайратланарли санъат асарлари тасвирланган Сикстин капелласи фотожамланмасини эътиборингизга ҳавола этади.

Сикстин капелласи Ватиканда жойлашган собиқ уй черкови бўлиб, 1473–1481 йилларда архитектор Жорж де Долчи томонида Рим папаси Сикста IV топшириғи билан қурилган, шунинг учун ҳам тарихий обидага унинг номи берилган. Капелла деворлари 1481–1483 йилларда Сандро Ботичелли, Пинтурикко ва бошқа рассом-ҳайкалтарошлар ишлаган санъат асарлари билан безатилган. Лоренцо Медичи ва папа ўртасида иттифоқ пайдо бўлганидан кейин флоренсиялик рассомлар Римга таклиф этилиб, ўша йилларда умбриялик рассомлар билан ҳамкорликда Капелла деворларига жило берилган.

Улар Ботичелли, Перуджино, Гирландаё ва Козимо Роселли ҳамда уларнинг ёрдамчилари – Пинтуриккио, Синорелли, Бартоломео делла Гатта, Давида Гирландаё, Пьеро де Казимо, Бьяджо д’Антонио каби тасвирий санъат вакиллари эди. Рассомлар барпо этган фрескалар сони 16 та бўлиб, бизгача 12 таси сақланиб қолган.

Бугунги кунда капелла музей сифатида фаолият кўрсатиш билан биргаликда, янги папаларни тайинлаш маросими ўтказилиши учун ҳам фойдаланилади. Сикстин капелласида дунёга машҳур мусиқачи эркаклар хори фаолият юритади. Бу хор католик черковининг Папа капелласи номи билан дунё бўйлаб шуҳрат қозонган. Ҳозирда Папа капелласи 1471 йил Сикст IV томонидан асос солинган Schola cantorum труппасининг давомчилари ҳисобланиб, 24 аъзодан иборат.

Замонавий Сикстин капелласи хори фақат папалик мактаби композицияларини эмас, балки ХХ ва XXI аср композиторлари ижодидан ҳам чиқишлар қилади. Тарихий хор билан бугунги хорнинг ягона боғлиқлиги бу гендер чекловлари ҳисобланади.

Қуйида Сикстин капелласининг фотосуратлари билан танишишингиз мумкин.