“Zakovat” ko‘rsatuvida yangi boshlovchi ish boshladi. Abdurasul Abdullayevga nima bo‘ldi?

So‘nggi vaqtlarda “Zakovat” intellektual teleo‘yini bir necha yillik boshlovchisining ishtirokisiz efirga uzatilayotgani ko‘pchilikni taajjublantirmoqda. Ko‘rsatuv muallifi va boshlovchisi Abdurasul Abdullayev o‘zi asos solgan loyihani tark etdimi? Jurnalist Nargiza Murodova bu savolga javob olish uchun Abdurasul Abdullayev bilan bog‘landi.

“Salomatligim bilan bog‘liq jiddiy vaziyat sabab so‘nggi ko‘rsatuvlarda ishtirok etolmadim. Yaqindagina yurak bilan bog‘liq jiddiy jarrohlik operatsiyasini boshdan o‘tkazdim. Shu bois ‘Zakovat’ ko‘rsatuvi boshlovchiligini shogirdim Saidkamol Abdurazzoqovga topshirdim. Nasib qilsa, dekabr oyining so‘nggi kunlarida efirga qaytaman”, —deydi Abdurasul Abdullayev.

Boshlovchining ta’kidlashicha, ayni kunlarda uning sog‘lig‘i bilan bog‘liq xavf yo‘q. Faqatgina muolajalarni o‘z vaqtida bajarsa va shifokor tavsiyalariga amal qilsa kifoya.

Ma’lumot uchun, 62 yoshli Abdurasul Abdullayev 35 yildan beri O‘zbekiston milliy teleradiokompaniyasi tizimida faoliyat yuritib keladi. Dastavval radioda suxandon amaliyotchisi lavozimida ish boshlagan Abdurasul Abdullayev oliy toifali suxandon darajasigacha yetib bordi. 1996-yilda televideniyeda muharrir sifatida o‘z faoliyatini davom ettirdi.

“Zakovat” intellektual teleo‘yinining ilk soni 2001-yilda, Navro‘z bayrami arafasida efirga uzatilgan. O‘tgan davr mobaynida ushbu ko‘rsatuv millionlab teletomoshabinlar e’tiborini jalb etdi, muxlislar qalbiga yo‘l topa oldi. Ko‘rsatuv tashkil etilganidan beri o‘nlab iste’dodli, bilimdon yoshlarni kashf etdi.

Abdurasul Abdullayev 2009-yilda “Mehnat shuhrati” ordeni bilan mukofotlangan.