COVID-19 koronavirus infeksiyasini paydo qiladigan SARS-CoV-2 virusiga qarshi antitana darajasi kasallikning yengil yoki o‘rtacha shakli bilan kasallangan bemorlarda besh oyga yaqin saqlanib qoladi. Bu kabi xulosa Nyu-Yorkdagi Mount Sinai tibbiyot markazi olimlari tomonidan berildi, deb xabar beradi “RBK”.
Tadqiqotda koronavirus tasdiqlangan 30 mingga yaqin odam ishtirok etgan. Olimlarning ta’kidlashicha, antitana qayta kasallanishdan himoyalashi yoki yana kasallikka chalingan odamda virusni kuchsizlantirishi mumkin.
Londondagi Imperial kolleji olimlari tomonidan avvalroq o‘tkazilgan tadqiqot natijalariga ko‘ra, koronavirus bilan kasallangan odamdagi antitanalar darajasi bir necha oy ichida qayta kasallanishdan himoya qila olmaydigan darajada kamayib ketishini aniqlangandi. Ayniqsa, tadqiqotchilar antitanalar darajasining keskin tushib ketishini COVID-19 bilan belgisiz kasallanganlarda qayd etgan. Shuningdek, olimlar 75 yoshdan katta bemorlarda ham antitana tez kamayib ketishini aniqlagan.
“Sputnik V” vaksinasining klinik tadqiqotlari rahbari Nikita Lomakin esa koronavirusdan sog‘ayganlarda antitanalar to‘liq 3-5 oyda yo‘qolib ketishini va ular qayta kasallanishi mumkinligini aytgandi.
Avvalroq Sog‘liqni saqlash vazirligi huzuridagi Koronavirusga qarshi kurash shtabi a’zosi Nargiza Nurullayeva O‘zbekistonda COVID-19 bilan qayta kasallanish holatlari qayd etilayotganini ma’lum qilgandi.
Mavzuga doir: Koronavirusga qarshi kurash shtabi a’zosi: Shtabga koronavirus bilan qayta kasallanish holati haqida ma’lumot kiritilmagan
24-avgust kuni esa Gonkong universiteti tadqiqotchilari koronavirusni qayta yuqtirib olish bo‘yicha dastlabki holat tasdiqlangani haqida ma’lum qildi. 33 yoshli erkakda COVID-19’ga chalinib, kasallikdan tuzalganidan to‘rt yarim oy vaqt o‘tib yana infeksiya yuqtirib olish holati kuzatilgan. Bemor birinchi marta koronavirus infeksiyasiga chalinganida unda kasallikning yengil belgilari kuzatilgan, hozirda ushbu alomatlar ham mavjud emas.
Izoh (0)