COVID-19 коронавирус инфекциясини пайдо қиладиган SARS-CoV-2 вирусига қарши антитана даражаси касалликнинг енгил ёки ўртача шакли билан касалланган беморларда беш ойга яқин сақланиб қолади. Бу каби хулоса Нью-Йоркдаги Mount Sinai тиббиёт маркази олимлари томонидан берилди, деб хабар беради «РБК».
Тадқиқотда коронавирус тасдиқланган 30 мингга яқин одам иштирок этган. Олимларнинг таъкидлашича, антитана қайта касалланишдан ҳимоялаши ёки яна касалликка чалинган одамда вирусни кучсизлантириши мумкин.
Лондондаги Империал коллежи олимлари томонидан аввалроқ ўтказилган тадқиқот натижаларига кўра, коронавирус билан касалланган одамдаги антитаналар даражаси бир неча ой ичида қайта касалланишдан ҳимоя қила олмайдиган даражада камайиб кетишини аниқланганди. Айниқса, тадқиқотчилар антитаналар даражасининг кескин тушиб кетишини COVID-19 билан белгисиз касалланганларда қайд этган. Шунингдек, олимлар 75 ёшдан катта беморларда ҳам антитана тез камайиб кетишини аниқлаган.
«Спутник V» вакцинасининг клиник тадқиқотлари раҳбари Никита Ломакин эса коронавирусдан соғайганларда антитаналар тўлиқ 3-5 ойда йўқолиб кетишини ва улар қайта касалланиши мумкинлигини айтганди.
Аввалроқ Соғлиқни сақлаш вазирлиги ҳузуридаги Коронавирусга қарши кураш штаби аъзоси Наргиза Нуруллаева Ўзбекистонда COVID-19 билан қайта касалланиш ҳолатлари қайд этилаётганини маълум қилганди.
Мавзуга доир: Коронавирусга қарши кураш штаби аъзоси: Штабга коронавирус билан қайта касалланиш ҳолати ҳақида маълумот киритилмаган
24 август куни эса Гонконг университети тадқиқотчилари коронавирусни қайта юқтириб олиш бўйича дастлабки ҳолат тасдиқлангани ҳақида маълум қилди. 33 ёшли эркакда COVID-19’га чалиниб, касалликдан тузалганидан тўрт ярим ой вақт ўтиб яна инфекция юқтириб олиш ҳолати кузатилган. Бемор биринчи марта коронавирус инфекциясига чалинганида унда касалликнинг енгил белгилари кузатилган, ҳозирда ушбу аломатлар ҳам мавжуд эмас.
Изоҳ (0)