AQSh Qorabog‘ nizosini hal etishga skandinaviyalik tinchlikparvarlarni yuborishni taklif qildi

Tog‘li Qorabog‘dagi vaziyatni tartibga keltirish uchun ushbu hududga Skandinaviyadan tinchlikparvarlarni joylashtirish maqsadga muvofiq. Bu haqda AQSh prezidentining milliy xavfsizlik masalalari bo‘yicha yordamchisi Robert O’Brayen Los-Anjelesdagi arman diasporasi bilan o‘tkazilgan uchrashuvda ma’lum qilgan, deb yozmoqda “Korrespondent.net”.

O’Brayen tinchlikparvarlarning Turkiyadan, balki Yevropada xavfsizlik va hamkorlik tashkilotining Minsk guruhiga a’zo mamlakatlar orasidan, xususan, AQShdan, shuningdek, Armaniston va Ozarbayjonga qo‘shni mamlakatlar orasidan tanlanmasligi kerakligini aytgan.

“Ikkala mamlakat ham skandinaviyalik tinchlikparvarlarning hududga kiritilishiga rozilik berishi lozim. Biz Skandinaviya mamlakatlarining hukumatlari bilan hududga kiritiladigan tinchlikparvarlar guruhini shakllantirish va Qorabog‘da o‘t ochmaslik rejimini qo‘llab-quvvatlash yuzasidan ish olib boryapmiz”, – degan AQSh siyosatchisi.

Uning so‘zlariga ko‘ra, Tog‘li Qorabog‘da o‘t ochmaslik rejimiga rioya etilishini ta’minlash ko‘p millatli tinchliksevar kuchlar yoki kuzatuvchilarning ishtirokisiz amalga oshmaydi.

Eslatib o‘tamiz, Skandinaviya mamlakatlariga Norvegiya, Shvetsiya, Daniya va Finlyandiya davlatlari kiradi.

Avvalroq Yerevanning Rossiyadan Tog‘li Qorabog‘da xavfsizlikni ta’minlashni so‘ragani xabar qilingan. Moskva bunga javoban janglar Armaniston hududiga o‘tadigan bo‘lsa, yordam ko‘rsatishga tayyorligini bildirgandi.

Boku esa uchinchi tomonning, ya’ni boshqa mamlakatlarning ushbu qurolli nizoga aralashuviga qarshi ekani, turk harbiylarining janglarda ishtirok etmayotganini ma’lum qilgan.

Tog‘li Qorabog‘dagi harbiy harakatlar tinchlikka erishish uchun qilingan uchta urinishga qaramasdan, 27-sentabrdan buyon davom etmoqda.