Tunis politsiyasi Facebook’dagi videopostida Nitssa shahrida sodir etilgan terakt uchun javobgarlikni o‘z zimmasiga olgan va o‘zini “Tunis janubidagi al-Mahdiy” guruhi tarafdori deb tanishtirgan shaxs hibsga olinganligini e’lon qildi. Bu haqda Tunis birinchi instansiya sudi axborot idorasi rahbari Muhsin ad-Daliga tayanib, “RIA Novosti” xabar qildi.
“Milliy Gvardiya huzuridagi antiterror guruhi tunda Facebook’da joylashtirilgan videodagi odamni hibsga oldi”, – dedi ad-Dali.
Unga ko‘ra, suratga olgan operator ham hibsga olingan va ushbu ikki shaxsga nisbatan tergov boshlangan. Bundan tashqari, vakil ta’kidlashicha, Tunis hukumati bunday guruh borligi haqidagi ma’lumotlarning qanchalik haqiqat ekanligini aniqlashga harakat qilmoqda.
Eslatib o‘tamiz, 29-oktabr kuni Fransiyaning Nitssa shahridagi Notr-Dam ibodatxonasida qurollangan erkak odamlarga hujum qilib, uch kishini o‘ldirdi. Jinoyatchi 21 yoshli tunislik bo‘lib chiqdi. Fransiya hukumati Nitssadagi hujumni terakt deb baholadi, mamlakatda terroristik xavfning eng yuqori darajasi e’lon qilindi.
29-oktabrning o‘zida Fransiyaning Avinyon shahrida pichoq bilan qurollangan erkak “Allohu akbar” deb qichqirib, politsiyachilarga hujum qilishga uringan. Politsiyachilar o‘t ochgan va hujum qilgan erkakni o‘ldirgan. Deyarli bir vaqtda Saudiya Arabistonining Jidda shahrida Fransiya konsulligiga hujum uyushtirilgan, konsullik qo‘riqchisi jarohat olgan. Hujum qilgan erkak qo‘lga olingan. Bundan tashqari, Fransiyada Lion shahrida ham sodir bo‘lishi mumkin bo‘lgan yana bir tajovuzkor harakatning oldi olingan.
Shuningdek, 30-oktabrda Parij shahrida qurollangan erkak politsiyachilarga hujum qilishga uringani xabar qilindi.
Izoh (0)