Tailandlik erkak dengizdan insonning g‘amgin yuziga o‘xshash boshli baliqni tutib oldi. Uning aytishicha, ushbu baliq uning omadini olib qo‘ygan, deb xabar beradi Newsflare.
26-oktabr kuni Krabi provinsiyasida istiqomat qiluvchi 33 yoshli Prasert Shukul ismli baliqchi Andaman dengizidagi kimsasiz orol qirg‘og‘iga havorang qisqichbaqalarni tutish uchun to‘r qo‘ygan. Biroq to‘rga g‘ayrioddiy baliq ilingan.
Baliqning tanasi kalta, ko‘z va og‘zi insonnikiga o‘xshash. “Uning tishlari yo‘q edi va u g‘amgin insonga o‘xshab ketardi”, — deydi Shukul. Erkakning tan olishicha, avvaliga u ushbu g‘ayrioddiy jonzotdan qo‘rqib ketgan va uni dengizga qo‘yib yuborishni o‘ylagan, biroq keyinroq uni qishloq aholisiga ko‘rsatishga qaror qilgan. G‘ayrioddiy baliq ularni ham qo‘rqitib yuborgan.
Erkak uyiga qaytishi bilan mahalliy dengiz biologlariga o‘zining o‘ljasi to‘g‘risida ma’lum qilgan. Ammo ular ham mazkur jonzot qaysi baliqlar oilasiga kirishini aniq ayta olmagan. Olimlarning so‘zlariga ko‘ra, u Pollicaris turi vakillariga o‘xshab ketadi.
Shukul baliq omadsizlik keltirishiga ishonib, uni uyida olib qolishni istamagan. Erkak o‘zining g‘ayrioddiy o‘ljasini biologlarga berib yuborgan.
Eslatib o‘tamiz, 2018-yilda Tasmaniya sohillarida dunyodagi eng kamyob baliqning yangi populyatsiyasi aniqlangan edi.
Izoh (0)