Таиландлик эркак денгиздан инсоннинг ғамгин юзига ўхшаш бошли балиқни тутиб олди. Унинг айтишича, ушбу балиқ унинг омадини олиб қўйган, деб хабар беради Newsflare.
26 октябрь куни Краби провинциясида истиқомат қилувчи 33 ёшли Прасерт Шукул исмли балиқчи Андаман денгизидаги кимсасиз орол қирғоғига ҳаворанг қисқичбақаларни тутиш учун тўр қўйган. Бироқ тўрга ғайриоддий балиқ илинган.
Балиқнинг танаси калта, кўз ва оғзи инсонникига ўхшаш. «Унинг тишлари йўқ эди ва у ғамгин инсонга ўхшаб кетарди», — дейди Шукул. Эркакнинг тан олишича, аввалига у ушбу ғайриоддий жонзотдан қўрқиб кетган ва уни денгизга қўйиб юборишни ўйлаган, бироқ кейинроқ уни қишлоқ аҳолисига кўрсатишга қарор қилган. Ғайриоддий балиқ уларни ҳам қўрқитиб юборган.
Эркак уйига қайтиши билан маҳаллий денгиз биологларига ўзининг ўлжаси тўғрисида маълум қилган. Аммо улар ҳам мазкур жонзот қайси балиқлар оиласига киришини аниқ айта олмаган. Олимларнинг сўзларига кўра, у Pollicaris тури вакилларига ўхшаб кетади.
Шукул балиқ омадсизлик келтиришига ишониб, уни уйида олиб қолишни истамаган. Эркак ўзининг ғайриоддий ўлжасини биологларга бериб юборган.
Эслатиб ўтамиз, 2018 йилда Тасмания соҳилларида дунёдаги энг камёб балиқнинг янги популяцияси аниқланган эди.
Изоҳ (0)