Samarqand viloyatining Qo‘shrabod tumanida YTHga uchragan haydovchida giyohvand moddasi borligi ma’lum bo‘ldi. Bu haqda “Daryo”ga viloyat IIB YHXB axborot xizmati ma’lum qildi.
https://www.youtube.com/watch?v=G9sWK4HQass&t=12s
Xabar berilishicha, 2020-yilning 26-oktabr kuni soat 15:00 da Qo‘shrabot tumanining Mustaqillik ko‘chasida joylashgan “Orom” to‘yxonasining ro‘parasida haydovchi T.R. o‘z boshqaruvidagi Labo’da yo‘lning qarama-qarshi tomoniga o‘tib harakatlangan. Natijada o‘z yo‘lida kelayotgan haydovchi S.S. boshqaruvidagi “Vaz-2101” bilan to‘qnashib, yo‘l-transport hodisasi sodir bo‘lgan.Yo‘l-transport hodisasi natijasida hech kim tan jarohati olmagan.
“Vaz-2101” haydovchisi S.S. 2004-yil Qo‘shrabot tumanida tug‘ilgan bo‘lib, tumandagi 48-maktabning 11-sinf o‘quvchisi bo‘lgan. Voyaga yetmagan S.S.ning haydovchilik guvohnomasi ham bo‘lmagan.
Viloyat IIB YXXB 4-otryad YPX inspektorlari Adham Zayniddinov va Kamoliddin Tog‘ayevlar hodisa joyini ko‘zdan kechirganda Labo haydovchisi R.T. og‘ziga noma’lum modda solib, yutishga harakat qilgan. Haydovchining harakatidan shubhalangan inspektorlar jamoat kuchi yordamida uning og‘zidan 1000 so‘mlik kupyuraga o‘ralgan, “Spichki” yozuvli gugurt qutisini olishga muvaffaq bo‘lgan. Gugurt qutisining ichida quruq holdagi, maydalangan, o‘tkir hidli giyohvandlik moddasiga o‘xshash modda hamda cho‘ntagida giyohvand modda iste’moli uchun moslashtirilgan, angishvona o‘rnatilgan “baklajka” qopqog‘i borligi aniqlangan.
Haydovchi R.T. tuman IIB ma’muriy binosiga olib borilib, tegishli tartibda hujjatlar rasmiylashtirilgan, giyohvandlik moddasiga o‘xshash modda va angishvona o‘rnatilgan “baklajka” qopqog‘i ashyoviy dalil tariqasida olingan.
Samarqand viloyat IIB EKB MTBning 26-oktabrdagi xulosasiga ko‘ra, haydovchi R.T.dan ashyoviy dalil tariqasida olingan “Spichki” yozuvli gugurt qutisidagi yashil rangli, o‘tkir hidli, quritilgan holdagi o‘simlik moddasi tarkibida giyohvand modda —tetragidrokannabinol mavjudligi aniqlangan. Bu modda marixuana giyohvandlik vositasi turiga kirishi, sof og‘irligi 0,47 grammga teng ekanligi, bir dona ko‘k rangli yelim qopqoq ichidan giyohvand modda — tetragidrokannabinol izlari topilganligi bayon qilingan.
2000-yil Kattaqo‘rg‘on shahrida tug‘ilgan fuqaro R.T. o‘z ko‘rsatmasida IIB xodimlari tomonidan topilgan giyohvand moddani o‘zi iste’mol qilishini ma’lum qilgan.
Mazkur holat yuzasidan Qo‘shrabod tuman IIB huzuridagi Tergov bo‘limi tomonidan tergovga qadar tekshiruv ishlari olib borilmoqda.
Izoh (0)