Самарқандда ЙТҲга учраган ҳайдовчида гиёҳванд моддаси борлиги маълум бўлди (видео)

Самарқанд вилоятининг Қўшрабод туманида ЙТҲга учраган ҳайдовчида гиёҳванд моддаси борлиги маълум бўлди. Бу ҳақда «Дарё»га вилоят ИИБ ЙҲХБ ахборот хизмати маълум қилди.

https://www.youtube.com/watch?v=G9sWK4HQass&t=12s

Хабар берилишича, 2020 йилнинг 26 октябрь куни соат 15:00 да Қўшработ туманининг Мустақиллик кўчасида жойлашган «Ором» тўйхонасининг рўпарасида ҳайдовчи Р.Т. ўз бошқарувидаги Labo’да йўлнинг қарама-қарши томонига ўтиб ҳаракатланган. Натижада ўз йўлида келаётган ҳайдовчи С.С. бошқарувидаги «Ваз-2101» билан тўқнашиб, йўл-транспорт ҳодисаси содир бўлган. Йўл-транспорт ҳодисаси натижасида ҳеч ким тан жароҳати олмаган.

«Ваз-2101» ҳайдовчиси С.С. 2004 йил Қўшработ туманида туғилган бўлиб, тумандаги 48-мактабнинг 11-синф ўқувчиси бўлган. Вояга етмаган С.С.нинг ҳайдовчилик гувоҳномаси ҳам бўлмаган.

Вилоят ИИБ ЙХХБ 4-отряд ЙПХ инспекторлари Адҳам Зайниддинов ва Камолиддин Тоғаевлар ҳодиса жойини кўздан кечирганда Labo ҳайдовчиси P.T. оғзига номаълум модда солиб, ютишга ҳаракат қилган. Ҳайдовчининг ҳаракатидан шубҳаланган инспекторлар жамоат кучи ёрдамида унинг оғзидан 1000 сўмлик купюрага ўралган, «Спички» ёзувли гугурт қутисини олишга муваффақ бўлган. Гугурт қутисининг ичида қуруқ ҳолдаги, майдаланган, ўткир ҳидли гиёҳвандлик моддасига ўхшаш модда ҳамда чўнтагида гиёҳванд модда истеъмоли учун мослаштирилган, ангишвона ўрнатилган «баклажка» қопқоғи борлиги аниқланган.

Ҳайдовчи P.T. туман ИИБ маъмурий биносига олиб борилиб, тегишли тартибда ҳужжатлар расмийлаштирилган, гиёҳвандлик моддасига ўхшаш модда ва ангишвона ўрнатилган «баклажка» қопқоғи ашёвий далил тариқасида олинган.

Самарқанд вилоят ИИБ ЭКБ МТБнинг 26 октябрдаги хулосасига кўра, ҳайдовчи P.T.дан ашёвий далил тариқасида олинган «Спички» ёзувли гугурт қутисидаги яшил рангли, ўткир ҳидли, қуритилган ҳолдаги ўсимлик моддаси таркибида гиёҳванд модда —тетрагидроканнабинол мавжудлиги аниқланган. Бу модда марихуана гиёҳвандлик воситаси турига кириши, соф оғирлиги 0,47 граммга тенг эканлиги, бир дона кўк рангли елим қопқоқ ичидан гиёҳванд модда — тетрагидроканнабинол излари топилганлиги баён қилинган.

2000 йил Каттақўрғон шаҳрида туғилган фуқаро P.T. ўз кўрсатмасида ИИБ ходимлари томонидан топилган гиёҳванд моддани ўзи истеъмол қилишини маълум қилган.

Мазкур ҳолат юзасидан Қўшрабод туман ИИБ ҳузуридаги Тергов бўлими томонидан терговга қадар текширув ишлари олиб борилмоқда.