Andijonda eng ko‘p qonun buzilishiga yo‘l qo‘ygan tashkilotlar nomi ma’lum qilindi

Andijon viloyatidagi tashkilot mas’ullari 2020-yilning o‘tgan davri mobaynida davlat xizmatlari ko‘rsatilishi borasida 7870 ta holatda qonunga zid harakat qilgan. Bu haqda “Daryo” muxbiri Umidjon Mamarasulov xabar berdi.

Davlat xizmatlari agentligi viloyat boshqarmasi boshlig‘i Mahmudjon Abdijaliyevning ma’lumot berishicha, boshqarmaning davlat organlari va boshqa tashkilotlar tomonidan davlat xizmatlari ko‘rsatilishi ustidan nazorat qilish bo‘limi tomonidan 2020-yilning o‘tgan davri mobaynida jami 7870 ta qonun buzilish holati aniqlangan.

Ularning 5535 tasi muddatni buzish, 253 tasi to‘g‘ridan to‘g‘ri xizmat ko‘rsatish, 19 tasi asossiz rad qilish, 1 tasi ortiqcha hujjat talab qilish va 2047 tasi boshqa tusdagi qonun buzilishlarni tashkil qilgan.

Aniqlangan holatlar yuzasidan 142 ta yozma ogohlantirish va 13 ta taqdimnoma kiritilgan hamda davlat xizmat ko‘rsatuvchi tashkilotlarining mansabdor va mas’ul xodimlarining 156 nafariga nisbatan ma’muriy bayonnoma rasmiylashtirilib, ular tegishli tartibda ma’muriy jazoga tortilgan. Shuningdek, 31 nafar xodimga nisbatan intizomiy ta’sir choralari qo‘llanilib, ularning 15 nafarini ma’muriy javobgarlikka tortilishi ta’minlangan.

Qo‘shimcha qilinishicha, davlat xizmatlarini ko‘rsatishdagi noqonuniy harakatlar bo‘yicha birinchi uchlikdan 2118 ta holat bilan sog‘liqni saqlash muassasalari, 1939 ta holatda “Hududgaz Andijon” gaz ta’minoti filiali korxonalari hamda 1629 ta qonun buzish bilan yer resurslari va davlat kadastri idoralari joy olgan.