Қашқадарё вилоятида яшовчи, аёли билан ажрашган фуқаро 3 нафар вояга етмаган фарзанди учун ундирилиши керак бўлган алимент пулини олдиндан тўлади, деб хабар бермоқда Мажбурий ижро бюроси «Дарё»га.
Маълум қилинишича, фуқаролик ишлари бўйича Чироқчи туман судининг 2020 йил 9 октябрдаги суд буйруғига асосан, қарздор О.Т.дан ундирувчи Н.Ж. фойдасига 3 нафар вояга етмаган фарзандининг моддий таъминоти учун улар вояга етгунга қадар ҳар ой жами даромадининг ярми миқдорида алимент ундириш белгиланган эди.
Ушбу суд буйруғи Мажбурий ижро бюроси Чироқчи туман бўлими иш юритувига 13 октябрь куни келиб тушди ва шу куннинг ўзида ижро иши юритишни қўзғатиш тўғрисида қарор қабул қилиниб, тарафларга юборилди.
Тарафлар 27 октябрь куни ўзаро келишув битимини имзолашди. Унга кўра, қарздор фарзандлари 18 ёшга тўлгунга қадар бўлган жами 259 миллион 250 минг сўмни бирйўла тўлаб берди.
Шу сабабли ушбу ижро ҳужжати амалда тамомланди.
Аввалроқ Бухоролик эркак икки хотинига бирданига 810 миллион сўмдан ортиқ алиментни олдиндан тўлаб бергани, Қашқадарёда 4 нафар фарзанди учун алимент тўловчи ота Damas’ини собиқ хотинининг номига расмийлаштириб бергани ва Нукусда карантин сабаб алимент тўлай олмай қолган ота икки уйидан бирини фарзандининг номига ўтказиб бергани ҳақида хабарлар берилганди.
Изоҳ (0)