Janubiy Koreya kompaniyasi hamda Stenford universiteti mutaxassislarning hamkorlikdagi harakatlari sabab o‘ta yuqori tiniqlikka ega displey yaratildi. Qo‘lga kiritilgan OLED paneldagi piksellar zichligi 1 dyuym uchun 10 mingga teng. Bu haqda universitet saytida e’lon qilingan ma’lumotlarda so‘z boradi.
Bu kabi zichlik ekrani ko‘zga juda yaqin turadigan gadjetlar uchun mo‘ljallangan. Taqqoslash uchun, zamonaviy smartfonlardagi piksellar zichligi har dyuymga 400-500 atrofida.
newOLED shartli nomini olgan ixtiro organik yorug‘lik diodlar texnologiyasi asosida yaratilgan. Shuningdek, bu turdagi yangi displeyni yaratishda olimlar quyosh panellari texnologiyasiga ham tayangan.
“Texnologiyamiz quyosh panellarini jihozlash uchun ham mos keladi, endi esa displeyga ta’sir ko‘rsatish imkoniyatimiz paydo bo‘ldi”, — deydi Stenford universiteti tadqiqotchisi Mark Brongersma.
newOLED’ga berilgan izohda panelni yaratish vaqtida uning qatlamlari orasiga yorug‘lik qaytaradigan maxsus plyonkalardan foydalanilgani yozilgan: bittasi kumushdan, ikkinchisi esa nanotuzilmaviy metalldan. Natijada ma’lum bir ranglar piksellar orqali rezonatsiyaga uchrasa, ushbu effekt hosil bo‘ladi. Shu orqali akslantirish panelining xususiyati o‘zgaradi va piksellar soni ortadi.
Mutaxassislarning aniqlik kiritishicha, yangi turdagi ekrandan iste’mol elektronikasida ham foydalanish mumkin. Xususan, VR-garnituralar va shu turdagi aksessuarlarda.
Avvalroq Avstraliyada inson sochidan OLED displey yaratilgani to‘g‘risida xabar berilgandi.
Izoh (0)