29 октябрь куни савдолар натижаларига кўра, Alphabet (Google’нинг бош компанияси), Facebook ва Twitter технологик компаниялар акциялари 5 фоиздан ҳам кўпроқ (ҳар бириники) тушиб кетди, деб ёзади «РБК». Пасайиш АҚШ Сенатининг савдо қўмитаси эшитувлари фонида бошланди.
Савдолар ёпилишига келиб, учта компания биргаликда бозор қийматида қарийб 107 миллиард доллар йўқотди:
Facebook акциялари 5,51 фоизга арзонлашди, компания капитализацияси 44,5 миллиард долларга пасайди;
Twitter акциялари нархи 5,34 долларга пасайди, компаниянинг бозор қиймати эса — 2,17 миллиард долларга;
Alphabet котировкалари 5,51 фоизга тушиб кетди, бутун компания 60 миллиард долларга арзонлашди.
Асосий савдолар ёпилгач, компания акциялари яна ўсишни бошлади. Twitter котировкалари эса постмаркетда 5,5 фоизга қимматлашиб, ўтган кун талафотини тўлиқ қоплаб олди.
Қонун чиқарувчилар Alphabet, Facebook ва Twitter раҳбарларини интернет ҳақидаги асосий қонунни ислоҳ қилишни масофадан муҳокама қилишга таклиф этганди. Мажлиснинг эълон қилинган мавзуси: «230-модданинг гап-сўзсиз ҳимояси бигтехлар (технологик гигантлар) суиистеъмолини келтириб чиқарадими?»
Бунда гап «Коммуникациялар соҳасидаги ахлоқ тўғрисида»ги АҚШ қонунининг 230-моддаси ҳақида бормоқда. Модда аслида ижтимоий тармоқлар ва IТ-компанияларни фойдаланувчилар томонидан жойлаштирилаётган контент учун жавобгарликдан озод қилади. У, шунингдек, компанияларга ўзлари беадаб, ҳақоратли ёки қандайдир сабабга кўра номақбул деб ҳисоблаган контентни кўришни чеклаб қўйиш имкониятини беради.
Янқинда Facebook ва Twitter New York Post’нинг АҚШ собиқ вице-президенти ва демократик партиядан президентликка номзод Жо Байденнинг оиласи ҳақидаги мақоласини кўришни чеклаб қўйганидан кейин ушбу қонун фаол муҳокама қилина бошлади.
Эшитувлар чоғида республикачилар интернет-платформаларнинг холис эмаслигини қайд этди. Демократлар, аксинча, контентнинг кўпроқ назорат қилиниши зарурлигини таъкидлади, айниқса, сайловлар ва жамоатчилик соғлиғини сақлаш ҳақидаги дезинформацияга нисбатан, шунингдек, компанияларни зарар келтирувчи контентни самарали ўчиришга қодир эмасликда айблади.
Ўзининг жавоб нутқида Twitter раҳбари Жек Дорси 230-моддани «сўз эркинлиги ва хавфсизлик ҳақидаги энг муҳим интернет қонуни» деб атади. Унинг фикрича, қонун низомларининг бекор қилиниши контент устидан назоратнинг сусайишига эмас, балки кучайишига олиб келади. Ундан ташқари, бу одамларнинг интернетда мулоқот қилиш жараёнига путур етказиши мумкин.
Таклиф этилган компаниялар раҳбарларининг сўзларига кўра, 230-модда улар учун сўз эркинлигини сақлаш ва назорат ўртасида мувозанат сақлашда восита бўлмоқда.
Эшитувларда Россиянинг 2020 йил сайловларига эҳтимолий аралашуви масаласига ҳам тўхталди. Бу масала юзасидан Twitter ва Facebook раҳбарлари Жек Дорси ва Марк Цукерберг уларда аралашиш эҳтимоли ҳақида ахборот йўқлигини маълум қилди.
Сенатдаги эшитувлар ҳозирча ҳеч қандай қарорларсиз якунланди. 3 ноябрдаги сайловлар натижаларига қараб қонунга боғлиқ вазият кескин ўзгариши мумкин, деб ёзади The Bell нашри.
Изоҳ (0)