Omskda tez yordam mashinalari COVID-19’ga chalingan bemorlarni hududiy sog‘liqni saqlash vazirligi binosiga olib keldi, chunki kasalxonalarda joy yetishmasligi tufayli ularni qabul qilishdan bosh tortishdi. Tibbiy xodimlarning norozilik aksiyalaridan keyin bemorlar uchun joy topildi. Bu haqda Meduza xabar bermoqda.
Birinchi tez yordam mashinasi SSV binosiga kechqurun soat to‘qqizdan keyin koronavirusga chalingan 70 yoshli ayolni olib keldi. Kompyuter tomografiyasi ayolning o‘pkasi 81 foiz zararlanganligini ko‘rsatdi, ammo shifoxonalarda joy yo‘qligi tufayli uni yotqiza olishmagan. Shifokorlar ayolni o‘n soatdan ortiq vaqt davomida shahar bo‘ylab olib yurgan. Ular SSV rahbari Irina Soldatovadan bemorni qayerga yotqizish haqida so‘rash uchun muassasa binosiga kelgan, deb yozadi “NGS Omsk”.
“Biz boshqa hech qayerdan javob ololmadik, balki shu yerda bizga javob aytishar, deb o‘yladik. Bemor ayolning kasalxonaga yotishga 100 foiz ehtiyoji bor, uni o‘z uyimga olib borolmayman, bu na insoniy, na tibbiy jihatdan to‘g‘ri bo‘ladi”, — dedi tez yordam xodimasi.
Uning qo‘shimcha qilishicha, bemorlarni olib borishga joy topilmasligi bilan bog‘liq vaziyatlar uning kichik stansiyasida deyarli har bitta smenada yuz beradi. Keksa bemorning qarindoshlari aytib berishicha, ular uchinchi kuni tez yordam chaqirgan. Bungacha ayolni kompyuter tomografiyasiga olib borishgan, ammo statsionarlarda uni qabul qilishdan bosh tortishgan.
Keyinroq Omsk viloyati sog‘liqni saqlash vazirligi binosiga yana ikkita tez yordam yetib keldi, deb yozadi “Komsomolskaya pravda”. “NGS Omsk” ma’lumotlariga ko‘ra, ikkinchi mashinada o‘pkasining 88 foizi zararlangan 85 yoshli erkak bo‘lgan, uni ham hech qaysi kasalxona qabul qilmagan. Uchinchi mashinada ikkala bemor uchun ham zarur bo‘lgan qo‘shimcha kislorod bo‘lgan.
Mashinalar diqqatni tortish uchun sirenalarini yoqqan. SSV binosidan hech kim chiqmagan, bemorlarning qarindoshlari vaxtadagilar bilan gaplashgan. Ammo ko‘p o‘tmay tez yordam mashinalari bemorlarni olib 2-sonli tez tibbiy yordam kasalxonasiga jo‘nagan. Keyinroq muassasa binosiga politsiya yetib kelgan.
Omsk viloyati tez yordam stansiyasi bosh shifokori Maksim Stukanov 2-sonli tez tibbiy yordam kasalxonasida bemorlar uchun joy topilganini “Komsomolskaya pravda”ga tasdiqladi. “Muammo bor edi, inkor etmaymiz: ertalabdan biz kasalxonalardan bo‘sh joy qidirib, odamlarni shahar bo‘ylab olib yurdik. Hozir joylar bo‘shay boshladi, 2-sonli tez tibbiy yordam kasalxonasida ikkita koyka paydo bo‘ldi. Kurashishda davom etamiz”, — dedi u.
Koronavirusga qarshi kurash bo‘yicha federal tezkor shtab ma’lumotlariga ko‘ra, Omsk viloyatida COVID-19’ga chalinish bo‘yicha jami 15 006 ta holat aniqlangan (ulardan qariyb mingtasi — oxirgi oyda). 11 917 kishi sog‘aygan, 402 kishi vafot etgan. Epidemiyaning ikkinchi to‘lqini boshlanganidan keyin hudud aholisi koronavirus statsionarlarida joylar yetishmayotganligi va tez yordam chaqirishdagi muammolar haqida ma’lum qilgan edi.
Izoh (0)