Омскда тез ёрдам машиналари COVID-19’га чалинган беморларни ҳудудий соғлиқни сақлаш вазирлиги биносига олиб келди, чунки касалхоналарда жой етишмаслиги туфайли уларни қабул қилишдан бош тортишди. Тиббий ходимларнинг норозилик акцияларидан кейин беморлар учун жой топилди. Бу ҳақда Meduza хабар бермоқда.
Биринчи тез ёрдам машинаси ССВ биносига кечқурун соат тўққиздан кейин коронавирусга чалинган 70 ёшли аёлни олиб келди. Компьютер томографияси аёлнинг ўпкаси 81 фоиз зарарланганлигини кўрсатди, аммо шифохоналарда жой йўқлиги туфайли уни ётқиза олишмаган. Шифокорлар аёлни ўн соатдан ортиқ вақт давомида шаҳар бўйлаб олиб юрган. Улар ССВ раҳбари Ирина Солдатовадан беморни қаерга ётқизиш ҳақида сўраш учун муассаса биносига келган, деб ёзади «НГС Омск».
«Биз бошқа ҳеч қаердан жавоб ололмадик, балки шу ерда бизга жавоб айтишар, деб ўйладик. Бемор аёлнинг касалхонага ётишга 100 фоиз эҳтиёжи бор, уни ўз уйимга олиб боролмайман, бу на инсоний, на тиббий жиҳатдан тўғри бўлади», — деди тез ёрдам ходимаси.
Унинг қўшимча қилишича, беморларни олиб боришга жой топилмаслиги билан боғлиқ вазиятлар унинг кичик станциясида деярли ҳар битта сменада юз беради. Кекса беморнинг қариндошлари айтиб беришича, улар учинчи куни тез ёрдам чақирган. Бунгача аёлни компьютер томографиясига олиб боришган, аммо стационарларда уни қабул қилишдан бош тортишган.
Кейинроқ Омск вилояти соғлиқни сақлаш вазирлиги биносига яна иккита тез ёрдам етиб келди, деб ёзади «Комсомольская правда». «НГС Омск» маълумотларига кўра, иккинчи машинада ўпкасининг 88 фоизи зарарланган 85 ёшли эркак бўлган, уни ҳам ҳеч қайси касалхона қабул қилмаган. Учинчи машинада иккала бемор учун ҳам зарур бўлган қўшимча кислород бўлган.
Машиналар диққатни тортиш учун сиреналарини ёққан. ССВ биносидан ҳеч ким чиқмаган, беморларнинг қариндошлари вахтадагилар билан гаплашган. Аммо кўп ўтмай тез ёрдам машиналари беморларни олиб 2-сонли тез тиббий ёрдам касалхонасига жўнаган. Кейинроқ муассаса биносига полиция етиб келган.
Омск вилояти тез ёрдам станцияси бош шифокори Максим Стуканов 2-сонли тез тиббий ёрдам касалхонасида беморлар учун жой топилганини «Комсомольская правда»га тасдиқлади. «Муаммо бор эди, инкор этмаймиз: эрталабдан биз касалхоналардан бўш жой қидириб, одамларни шаҳар бўйлаб олиб юрдик. Ҳозир жойлар бўшай бошлади, 2-сонли тез тиббий ёрдам касалхонасида иккита койка пайдо бўлди. Курашишда давом этамиз», — деди у.
Коронавирусга қарши кураш бўйича федерал тезкор штаб маълумотларига кўра, Омск вилоятида COVID-19’га чалиниш бўйича жами 15 006 та ҳолат аниқланган (улардан қарийб мингтаси — охирги ойда). 11 917 киши соғайган, 402 киши вафот этган. Эпидемиянинг иккинчи тўлқини бошланганидан кейин ҳудуд аҳолиси коронавирус стационарларида жойлар етишмаётганлиги ва тез ёрдам чақиришдаги муаммолар ҳақида маълум қилган эди.
Изоҳ (0)