AQShda o‘tgan bir hafta ichida 500 mingdan ortiq odamda koronavirus infeksiyasi tasdiqlandi, deb xabar beradi The New York Times. Ta’kidlanishicha, bu pandemiya boshlanganidan buyon bir hafta ichida kuzatilgan maksimal ko‘rsatkich hisoblanadi.
AQSh Kasalliklar nazorati va profilaktikasi markazining saytida esa o‘tgan yetti kun ichida 492 ming amerikalikda COVID-19 aniqlangani yozilgan.
Reuters ma’lumotlariga ko‘ra, infeksiyadan eng ko‘p O‘rta G‘arb mintaqasi, xususan, bir haftada 31 ming kishida koronavirus aniqlangan Illinoys va Pensilvaniya shtatlari jabr ko‘rgan.
Virus asoratlari oqibatida yuzaga kelgan kasalliklar oqibatida bir hafta ichida butun mamlakat bo‘ylab 5,6 mingdan ortiq odam vafot etgan, shifoxonaga murojaat qilganlar soni 13 foizga oshgan.
Bundan oldingi hafta AQShda 441,5 ming kishida koronavirus aniqlangan edi va bu iyul oxirlarida rekordni yangilangandi.
Jons Hopkins universiteti ma’lumotlariga ko‘ra, butun AQSh bo‘ylab koronavirusga chalinganlar soni 8,778 million kishidan oshgan, hozirga qadar 226,7 ming bemor COVID-19 qurboniga aylangan.
Avvalroq Jahon sog‘liqni saqlash tashkiloti butun dunyo bo‘ylab 19-oktabrdan 25-oktabrgacha 2,8 million kishida COVID-19 aniqlangani, bu pandemiya boshidan buyon eng katta ko‘rsatkich ekanligi to‘g‘risida xabar bergandi.
Izoh (0)