Koronavirusga qarshi ilk vaksinalar unchalik samarali bo‘lmasligi, ba’zilarga esa umuman ta’sir qilmasligi ham mumkin. Bu haqda Buyuk Britaniya hukumatining vaksinalar bo‘yicha maqsadli ishchi guruhi rahbari Keyt Bingem aytib o‘tdi, deb yozadi “RBK”.
“Birinchi avlod vaksinalari, ehtimol, mukammal bo‘lmaydi, va biz ular infeksiyaning oldini olishdan ko‘ra ko‘proq simptomlarni kamaytirishi mumkinligiga tayyor turishimiz kerak”, — deya ogohlantirdi u.
Bingemning aytishicha, hatto bunday ta’sir ham qisqa vaqt davom etishi mumkin. Mutaxassisning fikricha, odamlarning bir qismiga birinchi vaksinalar hech qanday ta’sir o‘tkazmasligi mumkin. “Xotirjamlikka va o‘ta katta optimizmga berilish kerak emas”, — dedi u.
Sentabr oyida Britaniya va Shvetsiyaning Oksford universiteti bilan hamkorlikda vaksina ishlab chiqayotgan AstraZeneca kompaniyasi AQShda dori sinovlarini to‘xtatgan, bunga Buyuk Britaniyadagi ko‘ngillilardan birida kamdan kam uchraydigan nevrologik kasallik yuzaga kelgani sabab bo‘lgan edi.
Ammo 24-oktabr kuni AstraZeneca vaksina sinovlarini qayta boshlagani xabar berildi. Undan sal avvalroq vaksina sinovida ishtirok etayotgan ko‘ngilli vafot etgani ma’lum qilingan.
Microsoft asoschisi Bill Geyts ham dastlabki vaksinalar ideal bo‘lmasligi ham mumkinligini tan olgan va barcha sinov bosqichidan o‘tgan koronavirusga qarshi vaksina AQShda kelasi yil boshlarida paydo bo‘lishini aytgan edi.
Avvalroq Rossiyada koronavirusga qarshi ikkinchi vaksinani ishlab chiqarish boshlangani xabar berilgandi.
Izoh (0)