Ozarbayjon prezidenti Ilhom Aliyev Rossiya poytaxtida Armaniston bosh vaziri Nikol Pashinyan bilan muzokara o‘tkazishga tayyorligini ma’lum qildi, biroq Aliyev Armaniston hukumatining Tog‘li Qorabog‘ mojarosini hal qilish bo‘yicha konstruktiv ish olib bora olishiga shubha bildirgan. Bu haqda “Interfaks” xabar berdi.
“Men bunday taklifni (Moskvada muzokaralar uchun) olmadim. Men Ozarbayjon, Armaniston va Rossiya prezidentlarining uch tomonlama uchrashuvlarida bir necha marta qatnashganman, biroq Armanistonda hokimiyatga Pashinyan kelganidan keyin bunday uchrashuvlar bo‘lmadi. Bu uchrashuvlar Armanistonning avvalgi prezidentlari bilan bo‘lgan, men bu uchrashuvlardan hech qachon bo‘yin tovlamaganman”, — deya ma’lum qilgan Aliyev.
Ilhom Aliyevning qayd etishicha, u mazkur uchrashuvlarni ijobiy deb hisoblagan, chunki Rossiya Minsk guruhining hamraisi sifatida muammoni hal qilishda alohida rol o‘ynaydi.
“Rossiya har doim Armaniston va Ozarbayjon bilan yaqin aloqalarni qo‘llab-quvvatlagan, bugun esa siyosiy, iqtisodiy hamkorlik yo‘nalishida Rossiya Ozarbayjon va Armaniston bilan juda faol hamkorlik qilmoqda, bizning qo‘shnimiz. Shuning uchun, albatta, bunday uchrashuvlar ko‘proq Rossiya hududida o‘tkazilgan, biroq Pashinyan davrida bunday uchrashuvlar bo‘lmadi. Ular hozir qanchalik samarali bo‘lishini bilmayman. Agar bunday taklif kelsa, biz har doim uni ijobiy ko‘rib chiqqanmiz va ko‘rib chiqamiz”, — deya ta’kidlagan Ozarbayjon prezidenti.
Ilhom Aliyev Moskvaga Armaniston bosh vaziri bilan muzokara o‘tkazish uchun hech qanday shartlarsiz yetib borishga tayyorligini bildirgan.
Avvalroq Armaniston bosh vaziri Nikol Pashinyan va Ozarbayjon prezidenti Ilhom Aliyev Tog‘li Qorabog‘dagi mojaro bo‘yicha muzokaralar o‘tkazishga tayyorligini ma’lum qilgandi.
Eslatib o‘tamiz, Tog‘li Qorabog‘dagi harbiy harakatlar tinchlikka erishish uchun qilingan uchta urinishga qaramasdan, 27-sentabrdan buyon davom etmoqda.
Izoh (0)