Коронавирусга қарши илк вакциналар унчалик самарали бўлмаслиги, баъзиларга эса умуман таъсир қилмаслиги ҳам мумкин. Бу ҳақда Буюк Британия ҳукуматининг вакциналар бўйича мақсадли ишчи гуруҳи раҳбари Кейт Бингем айтиб ўтди, деб ёзади «РБК».
«Биринчи авлод вакциналари, эҳтимол, мукаммал бўлмайди, ва биз улар инфекциянинг олдини олишдан кўра кўпроқ симптомларни камайтириши мумкинлигига тайёр туришимиз керак», — дея огоҳлантирди у.
Бингемнинг айтишича, ҳатто бундай таъсир ҳам қисқа вақт давом этиши мумкин. Мутахассиснинг фикрича, одамларнинг бир қисмига биринчи вакциналар ҳеч қандай таъсир ўтказмаслиги мумкин. «Хотиржамликка ва ўта катта оптимизмга берилиш керак эмас», — деди у.
Сентябрь ойида Британия ва Швециянинг Оксфорд университети билан ҳамкорликда вакцина ишлаб чиқаётган AstraZeneca компанияси АҚШда дори синовларини тўхтатган, бунга Буюк Британиядаги кўнгиллилардан бирида камдан кам учрайдиган неврологик касаллик юзага келгани сабаб бўлган эди.
Аммо 24 октябрь куни AstraZeneca вакцина синовларини қайта бошлагани хабар берилди. Ундан сал аввалроқ вакцина синовида иштирок этаётган кўнгилли вафот этгани маълум қилинган.
Microsoft асосчиси Билл Гейтс ҳам дастлабки вакциналар идеал бўлмаслиги ҳам мумкинлигини тан олган ва барча синов босқичидан ўтган коронавирусга қарши вакцина АҚШда келаси йил бошларида пайдо бўлишини айтган эди.
Аввалроқ Россияда коронавирусга қарши иккинчи вакцинани ишлаб чиқариш бошлангани хабар берилганди.
Изоҳ (0)