Buyuk Britaniyaning AstraZeneca kompaniyasi tomonidan yaratilgan COVID-19’ga qarshi vaksina sinovida qatnashayotgan ko‘ngilli vafot etdi

Braziliyaning Salomatlik bo‘yicha nazorat milliy agentligi Anvisa Buyuk Britaniyaning AstraZeneca kompaniyasi tomonidan yaratilgan koronavirusga qarshi vaksina sinovida ishtirok etayotgan ko‘ngilli vafot etganini ma’lum qildi, deb yozmoqda “RIA Novosti”.

Xabar berilishicha, nazorat organining bayonoti G1 portali tomonidan e’lon qilingan.

Bayonotda “etika va maxfiylik nuqtayi nazaridan” o‘limning sababi oshkor qilinmagan, shuningdek, ko‘ngilli platseboni yoki faol vaksinani qabul qilgani haqida ma’lumot berilmagan.

AstraZeneca kompaniyasi esa hozircha vaksinani sinovdan o‘tkazayotgan kishining o‘limi bo‘yicha rasmiy ma’lumotga ega emasligini va hozirgi mavjud ma’lumotga izoh bermasligini ma’lum qilgan.

Anvisa tomonidan berilgan ma’lumotga ko‘ra, vaksinalar sinovlari xavfsizligini baholash bo‘yicha xalqaro qo‘mita sinovlarni davom ettirishni tavsiya qilgan.

Avvalroq AstraZeneca bemorlarning birida ikkilamchi ta’sir paydo bo‘lgani sababli koronavirusga qarshi vaksinaning  AQShda o‘tkazilayotgan uchinchi faza sinovlarini to‘xtatib qo‘ygandi. Keyinroq kompaniya Buyuk Britaniyaning Dori vositalari va sog‘liqni saqlash boshqarmasining sinovlarni davom ettirishning xavfsizligi to‘g‘risida tasdig‘ini oldi va sinovlarni qayta boshladi.

Keyinchalik amerikalik olimlar AstraZeneca va Oksford universiteti hamkorligida yaratilgan koronavirusga qarshi vaksina sinovlarida ishtirok etuvchilarda aniqlangan nojo‘ya ta’sirlari to‘g‘risidagi hisobotlarida tafovut borligini aniqladi va kompaniyadan vaksinadan so‘ng paydo bo‘lgan noodatiy alomatlarni oshkor qilishni talab qildi.

Ma’lumot uchun, Buyuk Britaniyaning Oksford universiteti AstraZeneca kompaniyasi bilan birgalikda ChAdOx1 nCov-19 vektor vaksinasini yaratgan. Klinik sinovlarning birinchi va ikkinchi fazalari 2020-yilning aprelida boshlangan. Vaksinaning asosini odamlarda xavf tug‘dirmaydigan shimpanzelarda shamollashni qo‘zg‘atuvchi virus tashkil etadi. Shu bilan birga, inson organizmi uni COVID-19 koronavirusi sifatida qabul qilmoqda.

Sinovlarda 18-55 yosh oralig‘idagi 1077 nafar sog‘lom britaniyalik ishtirok etgan. Nomzod vaksinadan tashqari, ko‘ngillilarga platsebo yuborilgan. Olimlar tadqiqotlarning dastlabki ikkita fazasi natijalarini The Lancet jurnalida e’lon qilgan. Maqolada ta’kidlanishicha, vaksina 14 kun davomida organizmning sog‘lom hujayralarini zararli virus hujayralariga hujum qilishga undagan. Antitanalar virusni 28 kun ichida zararsizlantirgan.

Olimlarning ma’lum qilishicha, sinovdan o‘tkazilgan vaksinaning jiddiy salbiy ta’siri kuzatilmagan. Salbiy ta’sirlar orasidan inyeksiya yuborilgan joyda og‘riq, qizarish, shishish, qichishish, shuningdek, mushaklar og‘rig‘i, aralash og‘riqlar, charchoq, ko‘ngil aynishi, bosh og‘rig‘i, titroq va isitma chiqishi o‘rin olgan.

Oksford universiteti 20-iyun kuni klinik sinovlarning uchinchi fazasini boshlagan. Tadqiqotlar bir vaqtning o‘zida Buyuk Britaniya, Janubiy Afrika va Braziliyada o‘tkazilmoqda. Vaksina 8 mingdan ortiq ko‘ngillida sinovdan o‘tkazilishi ma’lum qilingan. Sinovlarning uchinchi fazasi dastlabki ikkitasining algoritmini takrorlaydi va iyul oyi oxirlarida yakunlanishi kerakligi xabar qilingandi.