Yevroittifoq aholisining bir qismigina 2022-yilgacha koronavirusga qarshi vaksina olishi mumkin, chunki Yevroittifoq buyurtma qilib qo‘ygan COVID-19’ga qarshi potensial dorilar samarasiz bo‘lib chiqishi yoki kam miqdorda ishlab chiqarilishi mumkin, deb yozadi “RBK”.
“2021-yil oxirigacha butun aholi uchun yetadigan COVID-19’ga qarshi vaksina dozasi bo‘lmaydi”, — degan Yevrokomissiya vakili Yevroittifoq diplomatlari bilan o‘tkazilgan yopiq majlisda.
Yevroittifoq koronavirusga qarshi jami 1 milliarddan ortiq dozada potensial vaksina buyurtma qilib qo‘ygan. Ularni AstraZeneca, Sanofi va Johnson & Johnson kabi kompaniyalar ishlab chiqmoqda.
Johnson & Johnson’ning bo‘linmasi Janssen Pharmaceutica NV bilan shartnoma oktabr boshida tuzilgan edi. Shartnomaga ko‘ra, agar dori xavfsiz va samarali bo‘lib chiqsa, Yevroittifoq mamlakatlari uni 200 million kishi uchun sotib oladi.
Avvalroq Buyuk Britaniyaning AstraZeneca kompaniyasi tomonidan yaratilgan koronavirusga qarshi vaksina sinovida ishtirok etayotgan ko‘ngilli vafot etgani ma’lum qilingan edi.
Microsoft asoschisi Bill Geyts barcha sinov bosqichidan o‘tgan koronavirusga qarshi vaksina AQShda kelasi yil boshlarida paydo bo‘lishini aytdi. Shu bilan birga, Geyts dastlabki vaksinalar ideal bo‘lmasligi ham mumkinligini tan olgan.
Rossiyada esa koronavirusga qarshi ikkinchi vaksinani ishlab chiqarish boshlandi.
Mavzuga doir:
- Johnson & Johnson farmatsevtik kompaniyasi ishtirokchilardan biri kasal bo‘lib qolgani tufayli COVID-19’ga qarshi vaksina sinovlarini to‘xtatdi
- AQShda Eli Lilly kompaniyasining COVID-19’ga qarshi dorisi sinovlari to‘xtatildi
- Xitoyning koronavirusga qarshi vaksinasi sinovlarida qatnashadigan o‘zbekistonlik ko‘ngillilarga pul to‘lanishi mumkin
Izoh (0)