Armaniston tinchlikparvarlarning, xususan, ular rossiyalik bo‘lsa ham Qorabog‘ nizosiga aralashuviga qarshi emas. Bu haqda Armaniston bosh vaziri Nikol Pashinyan ma’lum qilgan, deb yozmoqda “Interfaks”.
“Biz uchun hududga tinchlikparvarlarning kirishi me’yoriy holat. Ozarbayjonning tinchlikparvarlar haqidagi fikrlari Armanistonning bu boradagi qarashlaridan farq qiladi. O‘zaro kelishuvning amalga oshishiga kelsak, rossiyalik tinchlikparvarlarning bo‘lishi nizoning hal etilishini ta’minlashi mumkin. Rossiya Ozarbayjon bilan ham, Armaniston bilan ham yaxshi diplomatik munosabatlarga ega. Mintaqadagi boshqa mamlakatlarning fikrini ham inobatga olish kerak, muhimi haqiqatda tinchlikparvar bo‘lganlar hududdagi holatning barqarorlashuvini ta’minlashi kerak, aksincha bo‘lmasligi zarur”, – degan Pashinyan.
Eslatib o‘tamiz, Tog‘li Qorabog‘dagi harbiy harakatlar tinchlikka erishish uchun qilingan ikkita urinishga qaramasdan, 27-sentabrdan buyon davom etmoqda. Ozarbayjon va Armaniston 10-oktabr kuni soat 12:00 dan boshlab Tog‘li Qorabog‘da o‘t ochishni to‘xtatish to‘g‘risida kelishib olgandi. Ammo shu kuni keyinroq Armaniston va Ozarbayjon Mudofaa vazirliklari bir-birini Tog‘li Qorabog‘da o‘t ochishni to‘xtatish rejimini buzishda aybladi.
19-oktabrda Armaniston bosh vaziri Nikol Pashinyan va Ozarbayjon prezidenti Ilhom Aliyev Tog‘li Qorabog‘dagi mojaro bo‘yicha muzokaralar o‘tkazishga tayyorligini ma’lum qilgan. Keyinroq Pashinyan Tog‘li Qorabog‘da Rossiya uchun bevosita xavf soluvchi Suriya terrorchilik guruhlari jangarilari bo‘lganligi uchun Moskva u yerda aksilterrorchilik operatsiyalarini o‘tkazish uchun asosga ega ekanligini aytgan.
Turkiya esa Boku iltimos qilsa, “ikkilanmasdan” Ozarbayjonga askarlarini jo‘natishi va harbiy ko‘mak berishini ma’lum qildi.
Izoh (0)