Rossiya Federal xavfsizlik xizmati Moskva viloyatida qo‘lbola bombadan foydalanib, terakt uyushtirishni rejalashtirgan Markaziy Osiyo mamlakatlaridan birining fuqarosini qo‘lga oldi. Bu haqda “Interfaks” xabar berdi.
Ma’lum qilinishicha, qo‘lga olingan shaxs 1999-yilda tug‘ilgan bo‘lib, xalqaro terrorchilik tashkilotlarining jangarilari tomonidan berilgan ko‘rsatmalar asosida harakat qilgan. U davlat organlaridan birining binosida qo‘lbola portlovchi vosita yordamida terakt uyushtirishga tayyorlangan.
FXX tomonidan xabar berilishicha, rejalashtirilgan teraktdan keyin mazkur shaxs Yaqin Sharqdagi jangovar harakatlar hududiga terrorchilik guruhlari faoliyatida ishtirok etish uchun ketishni reja qilgan.
Qayd etilishicha, terrorchi tomonidan jihozlangan yashirin xonada qo‘lbola portlovchi vositalarning qismlari, foydalanilgan aloqa vositalarida esa rejalashtirilgan terakt yuzasidan jangarilar bilan amalga oshirilgan yozishmalar, portlovchi moddalar tayyorlash bo‘yicha internet qo‘llanma, shuningdek, terrorchilar boshlig‘iga qilingan qasamyod videoyozuvi topilgan.
Shuningdek, qo‘lga olingan shaxsning buyumlari orasidan IShID bayrog‘i, bir nechta mobil telefon va to‘pponcha topilgan.
Ayni paytda qo‘zg‘atilgan jinoyat ishi doirasida zarur tezkor qidiruv tadbirlari va tergov harakatlari amalga oshirilmoqda.
Avvalroq Rossiya Federal xavfsizlik xizmati Volgograd shahrida Suriyadagi terrorchilar ko‘rsatmasi asosida terakt rejalashtirgan ikki nafar jangarini yo‘q qilgandi, Keyinroq mazkur shaxslar O‘zbekiston fuqarolari bo‘lgani ma’lum qilindi.
Izoh (0)