Марказий Осиё давлатлари раҳбарларининг 2020 йил Бишкекда бўлиб ўтиши керак бўлган навбатдаги учинчи маслаҳат учрашуви коронавирус пандемияси сабабли 2021 йилга қолдирилди. Бу ҳақда Ўзбекистон ташқи ишлар вазири Абдулазиз Комилов «Янги Ўзбекистон» газетасига берган интервьюсида маълум қилди.
Аввалроқ ташқи ишлар вазири ўринбосари Илҳом Неъматов Марказий Осиё давлатлари раҳбарларининг август ойига Бишкекда ўтказилиши режалаштирилган учинчи маслаҳатлашув учрашуви коронавирус пандемияси сабаб кузга кўчирилиши мумкинлигини маълум қилганди.
«Афсуски, коронавирус билан боғлиқ вазият ва пандемияни бартараф этиш билан боғлиқ сананинг ноаниқлиги сабаб 2020 йил охиригача учинчи маслаҳат учрашувини ўтказиш учун имконият бўлмаслиги кўзга ташланиб қолди», — деган ТИВ раҳбари интервьюда.
Абдулазиз Комиловнинг айтишича, Туркманистон учинчи учрашувни 2021 йилда ўтказишни таклиф қилган. Биз маслаҳат кенгашининг ҳамраиси сифатида Туркманистоннинг ушбу таклифини тўлиқ қўллаб-қувватлаймиз ва навбатдаги Марказий Осиё маслаҳат учрашувини кенг ва сермазмун дастур асосида ўтказилишига умид қиламиз», — деб таъкидлаган вазир.
ТИВ раҳбарининг фикрича, Туркманистондаги саммитдан сўнг Қирғизистоннинг маслаҳат учрашувини Бишкекда ташкил этиш бўйича таклифига яна қайтиш мумкин.
«Лекин бу ҳолат қўшни давлатлар режалаштирилган минтақавий ҳамкорликни ривожлантириш ва чуқурлаштириш йўлида секинлашди деганини англатмайди», — дейди Абдулазиз Комилов. Унинг айтишича, кўп томонлама ҳамкорлик Марказий Осиёнинг бешта давлати учун устувор аҳамиятга эга.
Эслатиб ўтамиз, Марказий Осиё давлат раҳбарларининг маслаҳат учрашувларини мунтазам ўтказиш ташаббуси Ўзбекистон Президенти Шавкат Мирзиёев томонидан 2017 йил сентябрь ойида БМТ Бош Ассамблеясининг 72-сессиясида илгари сурилган эди. Бундай биринчи йиғилиш 2018 йил март ойида Қозоғистон пойтахтида, иккинчиси эса 2019 йил ноябрда Тошкентда ўтказилган ва ўшанда учинчи учрашувни Бишкекда ўтказишга қарор қилинганди.
Изоҳ (0)